ဂျန်ဇက် (NSS) - စက်တင်ဘာ ၂၇

ကနေဒါအစိုးရအနေနဲ့ ကနေဒါနိုင်ငံမှာ ဆစ်ဘာသာရေးခေါင်းဆောင်တစ်ဦး အသတ်ခံရမှုနဲ့ပတ်သက်ပြီး အိန္ဒိယ အစိုးရ ပါဝင်ဆက်နွယ်နေတယ်ဆိုတဲ့အချက်နဲ့ပတ်သက်ပြီး ခိုင်မာတဲ့သက်သေများ ပေးစေလိုကြောင်း အိန္ဒိယ နိုင်ငံခြားရေးဝန်ကြီးက တိုက်တွန်းတောင်းဆိုလိုက်ပါတယ်။

ကနေဒါနိုင်ငံမှာ နေထိုင်နေတဲ့ ဆစ်ဘာသာရေးခေါင်းဆောင်တစ်ဦးဖြစ်တဲ့ Hardeep Singh Nijjar  ဆိုသူ အသတ် ခံရခြင်းနဲ့ပတ်သက်ပြီး ကနေဒါ နဲ့ အိန္ဒိယနိုင်ငံကြား တင်းမာမှုတွေမြင့်တက်နေချိန်မှာ အိန္ဒိယအစိုးရက အခုလိုမျိုး တောင်းဆိုခဲ့တာပါ။ 

ကနေဒါအစိုးရက ၎င်းတို့နိုင်ငံမှာနေထိုင်နေတဲ့ အိန္ဒိယခွဲထွက်ရေးသမားတစ်ဦးဖြစ်သလို ဆစ်ဘာသာရေး ခေါင်းဆောင် အသတ်ခံရမှုနဲ့ပတ်သက်ပြီးနောက်ကွယ်မှာ အိန္ဒိယအစိုးရ ပါဝင်နေကြောင်း မကြာသေးမီက ဝေဖန် ပြစ်တင်ခဲ့ပါတယ်။ အိန္ဒိယအစိုးရကတော့ ကနေဒါနိုင်ငံရဲ့စွပ်စွဲမှုတွေကို ငြင်းဆန်ထားပြီး၊ အခြေအမြစ်မရှိကြောင်း တုံ့ပြန်ထားပါတယ်။ 

အိန္ဒိယနိုင်ငံခြားရေးဝန်ကြီး S Jaishankar က ကနေဒါအစိုးရရဲ့စွပ်စွဲချက်များနဲ့ပတ်သက်ပြီး လွတ်လပ်ပွင့်လင်းစာ စစ်ဆေးသွားမှာဖြစ်ပြီး ခိုင်လုံတဲ့သက်သေရှိမယ်ဆိုရင် ပေးစေလိုကြောင်းပြောပါတယ်။ 

၎င်းက "ကျွန်တော်တို့ဟာ ကနေဒါအစိုးရကို ပြောဆိုထားပြီးဖြစ်ပါတယ်။ လူသတ်မှုကျူးလွန်တာတွေက အိန္ဒိယ အစိုးရရဲ့မူဝါဒတွေထဲမှာ မပါဝင်ဘူး။ ကနေဒါအစိုးရဟာ အဲဒီခွဲထွက်ရေးသမားအသတ်ခံရမှုနဲ့ပတ်သက်ပြီး ခိုင်လုံ တိကျတဲ့သက်သေအချက်လက်တွေရှိမယ်ဆိုရင် အိန္ဒိယအစိုးရကို မျှဝေစေလိုတယ်။ အိန္ဒိယအစိုးရက ပွင့်လင်း မြင်သာစွာ စုံစမ်းစစ်ဆေးသွားမှာပါ" လို့ ပြောပါတယ်။ 

အဆိုပါ ဆစ်ဘာသာရေးခေါင်းဆောင်ဟာ ပြီးခဲ့တဲ့ဇွန်လက ကနေဒါနိုင်ငံရှိ  ဘုရားကျောင်းအနီးမှာ သေနတ်နဲ့ ပစ်သတ်ခံခဲ့ရတာဖြစ်ပါတယ်။