ဂျန်ဇက် (NSS) - အောက်တိုဘာလ ၃

အမေရိကန်စစ်တပ်တွင်အသုံးပြုနိုင်မည့် စက်ရုပ်စနစ်များကို ဒီဇိုင်းရေးဆွဲခြင်း၊ ထုတ်လုပ်ခြင်းနှင့် လက်တွေ့အသုံးပြုခြင်းတို့အတွက် ကိုယ်တိုင်လည်ပတ်နိုင်မည့်စစ်ဆင်ရေးကွပ်ကဲမှုဌာနအသစ် တစ်ခုကို အမေရိကန်စစ်ဌာနချုပ်ပင်တဂွန်က ဖွဲ့စည်းသွားမည်ဖြစ်ကြောင်း အမေရိကန်စစ်ရေးဝန်ကြီး ပီတီဟတ်ဆတ်ကပြောကြားခဲ့သည်။

စစ်ဘက်ဆိုင်ရာ AI နည်းပညာကြောင့်ဖြစ် ပေါ်လာနိုင်သည့် ခြိမ်းခြောက်မှုများနှင့်ပတ်သက်ပြီး ကျွမ်းကျင်သူ များက သတိပေးချက်များထုတ်ပြန်နေချိန်တွင် အဆိုပါကြေညာချက် ထွက်ပေါ်လာခြင်း လည်းဖြစ်သည်။ AI နည်းပညာ ကို အလွန်အမင်း အားကိုးအားထားပြုခြင်းသည် လူသားတို့၏ ဝေဖန် ပိုင်းခြားတွေးခေါ်နိုင်စွမ်းကို လျော့ပါးစေနိုင်ပြီး အယ်လ်ဂိုရစ်သမ်များ၏ ဆုံးဖြတ်ချက်ချမှတ်ပုံက ကြိုတင်ခန့်မှန်း၍မရနိုင်ခြင်းကြောင့် မတော်တဆဖြစ်လာနိုင်မှုအန္တရာယ်ကိုမြင့်တက်စေနိုင်ပြီး အရပ်သားများအတွက် အန္တရာယ်များသောစစ်ပွဲကို ဖြစ်လာစေနိုင်ကြောင်း ကျွမ်းကျင်သူများက ပြောကြားထားကြသည်။

AutoWarCom ဟုအမည်ပေးထားသည့် ယင်းဌာနအသစ်က ခေတ်သစ်စစ်ရေးသမိုင်းတွင် ငြိမ်းချမ်းရေးကာလ အတွင်း အလျင်မြန်ဆုံးပြောင်း လဲမှုတစ်ရပ်အဖြစ် အမေရိကန်စစ်တပ်တွင် ကိုယ်ပိုင်လည်ပတ်နိုင်စွမ်းနှင့် စက်ရုပ် နည်းပညာစွမ်းရည်များကို တိုးချဲ့အသုံးပြုနိုင်ရန်ရည်ရွယ်ထားသည့် ဝန်ဆောင်မှုအဖွဲ့အစည်းပုံစံမျိုးလုပ်ပိုင်ခွင့်များ ရရှိ လိမ့်မည်ဖြစ်ကြောင်း ပီတီဟတ်ဆတ်က ပြောကြားခဲ့သည်။ 

ပီတီဟတ်ဆတ်က “ SI(Super Intelli­gence) နည်းပညာနဲ့ ပစ်မှတ်ရှာဖွေနိုင်စွမ်းကိုမြှင့်တင်ထားတဲ့ ဒရုန်း စစ်ဆင်ရေးစနစ်တွေဟာ မျိုးဆက်ပေါင်းများစွာအတွင်း စစ်မြေပြင်မှာဖြစ်ပေါ်လာမယ့် အကြီးဆုံးတော်လှန်ပြောင်းလဲမှု တစ်ခု ဖြစ်လာပါလိမ့်မယ်”ဟုပြောဆိုခဲ့သည်။ အဆိုပါနေ့မတိုင်မီတွင် အမေရိကန်သမ္မတဒေါ်နယ်ထရမ့်က အမေရိကန် အစိုးရ၏ ဝေါဟာရအသုံးအနှုန်းများတွင် Artificial Int­elligence(AI) ဟူသောစကားလုံးအစား Super Intelligence(SI) ဆိုသောစကားလုံးကို အစားထိုး သုံးစွဲရန် အမိန့်စာတစ်စောင်ကို လက်မှတ်ရေးထိုးခဲ့ ကြောင်းသိရသည်။ ယူကရိန်းပဋိ ပက္ခတွင် ရုရှားနှင့် ယူကရိန်းတို့ကဒရုန်းများကို ကျယ်ကျယ်ပြန့်ပြန့်အသုံးပြုနေခြင်းမှရရှိခဲ့သောသင်ခန်းစာများက အဆိုပါ ကွပ်ကဲမှုဌာနအသစ်ကို စတင်ဖွဲ့စည်းရခြင်း၏ အဓိကတွန်းအားပေးချက်များထဲမှတစ်ခုဖြစ်ကြောင်း ပီတီဟတ် ဆတ်ကပြောကြားခဲ့သည်။

ထို့ပြင် လက်နက်အရေအတွက်အနည်း ငယ်သာဝယ်ယူပြီး ခေတ်မီဆန်းပြားသောလက်နက် များကိုသာ ရွေးချယ်ဝယ်ယူခြင်းဆိုသည့် ပင်တဂွန်စစ် ဌာနချုပ်၏ ရေရှည်မဟာဗျူဟာသည် အကျိုးသက် ရောက်မှုသိပ် မရှိတော့ ကြောင်း ပီတီဟတ်ဆတ်က ထောက်ပြပြောဆိုခဲ့သည်။ ပီတီဟတ်ဆတ်က “စစ်ပွဲပုံစံတွေက သိသိ သာသာကိုပြောင်း လဲလာခဲ့ပါပြီ။ ခေတ်မီကွန်ပျူတာ ကြောင့် တိကျမှုရှိပြီး ကုန်ကျစရိတ်သက်သာတဲ့လက် နက်တွေကို အမြောက် အမြားလည်း ထုတ်လုပ်လာနိုင်ပါပြီ။ ဒီလက်နက်စနစ်တွေက ကျွန်တော်တို့ရဲ့ ကုန်ကျစရိတ်ကြီးမားတဲ့ လက်ရှိ လက်နက်စနစ်ဟောင်းတွေကို သိသိသာသာခြိမ်းခြောက်လာနေသလို တပ်ဖွဲ့တွေရဲ့အလားအလာကိုလည်း နှောင့်ယှက် နေပါတယ်။ ဒါကြောင့်မို့လို့ အရေးတကြီး ပြောင်းလဲမှုတွေ လုပ်ဆောင်ဖို့က လိုအပ်နေပါတယ်” ဟုပြောဆိုခဲ့သည်။