သန့်မင်းအိမ် (NSS) - အောက်တိုဘာ ၃

အယ်နီညိုရာသီဥတုဖြစ်စဉ်ကြောင့် အပူချိန်လွန်ကဲခြင်း၊ မိုးခေါင်ရေရှားခြင်းနှင့် ရာသီဥတုမူမမှန်ခြင်းများဖြစ်ပေါ်နိုင်သဖြင့် ကြိုတင်ပြင် ဆင်ထားရန် နေပြည်တော်သဘာဝဘေးအန္တရာယ်ဆိုင်ရာစီမံခန့်ခွဲမှုအဖွဲ့ဥက္ကဋ္ဌ၊ နေပြည်တော်ကောင်စီဥက္ကဋ္ဌ ဦးကံမြင့်သန်းက ယမန်နေ့ (အောက်တိုဘာ ၂ ရက်) နံနက်ပိုင်းတွင် နေပြည်တော်ကောင်စီရုံးအစည်းအဝေးခန်းမ၌ ကျင်းပသည့် နေပြည်တော် သဘာဝဘေးအန္တရာယ်ဆိုင်ရာစီမံခန့်ခွဲမှုအဖွဲ့ လုပ်ငန်းညှိနှိုင်းအစည်းအဝေးတွင် ပြောကြားခဲ့သည်။

နေပြည်တော်အတွင်းဖြစ်ပွားနိုင်သည့်ဘေးအန္တရာယ်များမှာ မီးဘေး၊ ရေဘေး၊ လေဘေး၊ ငလျင်ဘေး၊ မိုးခေါင်ရေရှားဘေး၊ မိုးကြိုးဘေးနှင့် မြေပြိုဘေးများ ဖြစ်ပွားနိုင်ကြောင်းနှင့်သဘာဝဘေးများဖြစ်ပွားရသည့် အဓိကအကြောင်းရင်းမှာ သဘာဝပတ်ဝန်းကျင်များ ထိခိုက်ပျက်စီးလာခြင်းဖြစ်ပြီး ရာသီဥတုပြောင်းလဲခြင်းကြောင့် မုန်တိုင်းဘေး၊ ရေဘေးများလည်း မကြာခဏ ဖြစ်ပေါ်လာသည်ကို တွေ့ရကြောင်း နေပြည်တော်ကောင်စီဥက္ကဋ္ဌက ပြောသည်။

ထို့ပြင် နွေ နှင့် ဆောင်းကုန်ကာလများတွင် အပူချိန်လွန်စွာမြင့်တက်သည့်အတွက် လေပြင်းဘေးနှင့် လေဆင်နှာမောင်းဘေးများ ဖြစ်ပေါ်လာနိုင်ပြီး မိုးကြိုးဘေးမှာလည်း တစ်နှစ်ထက်တစ်နှစ် ပိုမိုအဖြစ်များလာကြောင်း ၎င်းက ဆိုသည်။

အယ်နီညိုရာသီဥတုဖြစ်စဉ်သည် ပစိဖိတ်သမုဒ္ဒရာအီကွေတာအနီးရှိ ပင်လယ်ရေမျက်နှာပြင်အပူချိန် မြင့်တက်လာခြင်းနှင့်အတူ ကမ္ဘာ့လေထုစနစ် လည်ပတ်မှုပြောင်းလဲလာခြင်းကြောင့် ကမ္ဘာလုံးဆိုင်ရာ ရာသီဥတုပြောင်းလဲမှုဖြစ်စဉ်များနှင့် အစွန်းရောက်မိုးလေဝသဖြစ်စဉ်များ အကြိမ်ရေများစွာ ဖြစ်ပေါ်နိုင်သည့်အပြင် အာရှတိုက်နှင့် အရှေ့တောင်အာရှဒေသများ၏ မိုးရေချိန်နှင့် အပူချိန်စံနှုန်းများအပေါ် တိုက်ရိုက်သက်ရောက်စေနိုင်ပြီး ပိုမိုပြင်းထန်နိုင်ကြောင်းနှင့် အယ်နီညိုဖြစ်သည့်နှစ်များတွင် ကမ္ဘာတစ်ဝန်း၌ အပူချိန်လွန်ကဲခြင်း၊ မိုးခေါင်ရေရှားခြင်းနှင့် ရာသီဥတုမူမမှန်ခြင်းများကို ကြုံတွေ့ရလေ့ရှိကြောင်း ၎င်းကပြောကြားခဲ့သည်။

မြန်မာ့သမိုင်းတစ်လျှောက်တွင်လည်း အယ်နီညိုဖြစ်စဉ်၏ ရိုက်ခတ်မှုများကြောင့် စံချိန်တင်အပူချိန်များနှင့် မိုးရွာသွန်းမှုမူမမှန်ခြင်းများ ဖြစ်ပေါ်ခဲ့သဖြင့် စိုက်ပျိုးရေးနှင့် ကျန်းမာရေးဆိုင်ရာစိန်ခေါ်မှုများကို ရင်ဆိုင်ခဲ့ရကြောင်း နေပြည်တော်ကောင်စီဥက္ကဋ္ဌ ဆိုသည်။

အဆိုပါ အယ်နီညိုကြောင့် စိုက်ပျိုးရေးနှင့် မွေးမြူရေးကဏ္ဍတို့တွင် စိုက်ပျိုးရေလျော့နည်းခြင်းကြောင့် စပါး၊ ပဲ၊ နှမ်းနှင့် ဆီထွက်သီးနှံများ ပျက်စီးနိုင်ခြင်း၊ အပူဒဏ်ကြောင့် တိရစ္ဆာန်များ ရောဂါရလွယ်ခြင်းတို့ ဖြစ်ပေါ်နိုင်ပြီးအပူဒဏ်ကြောင့် အပူလျှပ်ခြင်း၊ ရေဓာတ်ခမ်းခြောက်ခြင်း၊ ရေရှားပါးမှုမှတစ်ဆင့် ဝမ်းပျက်ဝမ်းလျှောရောဂါ ဖြစ်ခြင်းစသည့် ရေမှတစ်ဆင့် ကူးစက်ရောဂါများဖြစ်ပွားနိုင်ကြောင်း နေပြည်တော်ကောင်စီဥက္ကဋ္ဌ ပြောကြားခဲ့သည်။

ထို့ပြင် ရေလှောင်တမံများတွင် ရေဝင်နည်းပါးခြင်းကြောင့် လျှပ်စစ်ဓာတ်အားထုတ်လုပ်မှုလျော့ကျနိုင်ကြောင်းလည်း နေပြည်တော်ကောင်စီဥက္ကဋ္ဌက ပြောသည်။

ထို့ကြောင့် အဆိုပါအခြေအနေများကို အထူးဂရုပြု၍ ကြိုတင်ကာကွယ်ရေးလုပ်ငန်းများ စီမံဆောင်ရွက်ထားရန် လိုအပ်ကြောင်း နှင့် အပူချိန်လွန်ကဲမှုကြောင့် မြေအောက်ရေလျော့နည်းကျဆင်းမှုနှင့် ရေရှားပါးပြတ်လပ်မှုများ ဖြစ်ပေါ်လာနိုင်သည့်အတွက် သောက်သုံးရေနှင့် စိုက်ပျိုးရေအတွက် လိုအပ်သည့်ရေများကို ကြိုတင်စုဆောင်းထားရှိရန် လိုအပ်ကြောင်း ၎င်းက ပြောကြားသည်။

ပူပြင်းခြောက်သွေ့သည့် ရာသီဥတုကြောင့် တောမီးလောင်ကျွမ်းမှုများ ပိုမိုဖြစ်ပွားနိုင်သဖြင့် မီးဘေးအန္တရာယ် ကြိုတင်ကာကွယ်မှုများကိုလည်း ဆောင်ရွက်ရန်လိုအပ်ကြောင်း နေပြည်တော်ကောင်စီဥက္ကဋ္ဌ ဆိုသည်။

ထို့အပြင် ကလေးများ၊ သက်ကြီးရွယ်အိုများ၊ မသန်စွမ်းသူများနှင့် အပူဒဏ်ခံနိုင်ရည်နည်းသူများအတွက် ကျန်းမာရေးစောင့်ရှောက် မှုများကို ကြိုတင်ပြင်ဆင်ဆောင်ရွက်ထားရန် လိုအပ်ကြောင်း၊ ကြိုတင်ပြင်ဆင်၍ရသည်များကို ယခုကတည်းက စနစ်တကျ စဉ်းစားပြင်ဆင်ဆောင်ရွက်ထားရန်လည်း နေပြည်တော်ကောင်စီဥက္ကဋ္ဌက ပြောကြားခဲ့သည်။

အယ်နီညိုကြောင့် မုန်တိုင်းဖြစ်ပေါ်ပြီး မိုးသည်းထန်စွာရွာသွန်းမှုများ ဖြစ်ပေါ်လာနိုင်သည့်အတွက် ပြည်ထောင်စုနယ်မြေ၊ နေပြည်တော် အတွင်း ရေမြောင်းများ ပိတ်ဆို့မှုမဖြစ်ပေါ်စေရေး၊ ရေစီးရေလာကောင်းမွန်စေရေးနှင့် ရေကြီးရေလျှံမှုများ မဖြစ်ပေါ်စေရေးအတွက် ရေနုတ်မြောင်းရှင်းလင်းခြင်းလုပ်ငန်းများကို ယာဉ်ယန္တရားများနှင့် လူအင်အားများဖြင့် အရှိန်အဟုန်ဖြင့် ဆောင်ရွက်သွားရန် ညွှန်ကြားထားပြီးဖြစ်ကြောင်း နေပြည်တော်ကောင်စီဥက္ကဋ္ဌ ဆိုသည်။

သဘာဝဘေးအန္တရာယ်သည် ကြိုတင်မှန်းဆ၍မရသဖြင့် ဘေးအန္တရာယ်များ ဖြစ်ပေါ်လာပါက လူ့အသက်ဆုံးရှုံးမှု အနည်းဆုံးဖြစ်အောင် ရှာဖွေကယ်ဆယ်နိုင်ရေးနှင့် အရေးပေါ်တုံ့ပြန်ဆောင်ရွက်နိုင်ရန် ကြိုတင်ပြင်ဆင်မှုများ ဇာတ်တိုက်ထားရှိရန် လိုအပ်ကြောင်းနှင့် ဇာတ်တိုက်ထားသည့်အတိုင်း ကူညီဆောင်ရွက်ပေးကြရန် လိုအပ်ကြောင်း နေပြည်တော်ကောင်စီဥက္ကဋ္ဌ ပြောကြားခဲ့သည်။