သန့်ဇင် (NSS) - အောက်တိုဘာ ၃

ဟိုတယ်လုပ်ငန်းများတွင် လုံခြုံစိတ်ချရမှုကို အဓိကထား အရှိန်အဟုန်မြှင့်ဆောင်ရွက်ရန်လိုကြောင်း ယဉ်ကျေးမှု၊ ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စုဝန်ကြီး ဦးမောင်မြင့်က ယမန်နေ့(အောက်တိုဘာ ၂ ရက်) မွန်းလွဲပိုင်းတွင် ရန်ကုန်မြို့ရှိ Novotel Yangon Max ဟိုတယ်၌ကျင်းပသည့်  မြန်မာနိုင်ငံဟိုတယ်ဆိုင်ရာ လုပ်ငန်းရှင်များအသင်း (ရန်ကုန်ဇုန်) မိတ်ဖက်ကုမ္ပဏီများနှင့်ပူးပေါင်းကျင်းပသည့် ဟိုတယ်လုပ်ငန်းသုံးပစ္စည်း ပြပွဲ နှင့် "7th MEMBERS GALA DINNER 2026" တွင် ပြောကြားခဲ့သည်။

ဟိုတယ်နှင့်ခရီးသွားလာရေးကဏ္ဍသည် နိုင်ငံတော်၏ ရင်းနှီးမြှုပ်နှံမှု၊ ခရီးသွားဧည့်သည်များ ဝင်ရောက်မှုနှင့် စီးပွားရေးဖွံ့ဖြိုးတိုးတက်မှုအတွက် အဓိကကျသော အစိတ်အပိုင်းတစ်ခုဖြစ်ကြောင်း ပြည်ထောင်စုဝန်ကြီးက ဆိုသည်။

ဟိုတယ်လုပ်ငန်းများတွင် ဝန်ဆောင်မှု ပိုမိုကောင်းမွန်ရေး၊ လုံခြုံစိတ်ချရမှု၊ အာမခံချက်ရှိမှုနှင့် အဆင်ပြေစေမှုတို့ ကို အဓိကထား၍ စနစ်တကျ အရှိန်အဟုန်မြှင့် ဆောင်ရွက်ရန်လိုအပ်ကြောင်းလည်း ပြည်ထောင်စုဝန်ကြီးက ပြောကြားခဲ့သည်။

အဓိကလုပ်ငန်းစဉ်ဌာနများ၏ အခန်းကဏ္ဍ - Front Office, Housekeeping, Food & Beverage နှင့် Culinary စသည့် အဓိကဌာနများ၏ ဝန်ဆောင်မှုအဆင့်အတန်း မြင့်မားလာစေရန် အသင်းကြီးက ကူညီဆောင်ရွက်ပေး လျက်ရှိကြောင်းလည်း ပြည်ထောင်စုဝန်ကြီးက ဆိုသည်။

ထို့ပြင် လုပ်ငန်းများရေရှည်တည်တံ့စေရန် လူ့စွမ်းအားအရင်းအမြစ်ဖွံ့ဖြိုးတိုးတက်ရေးကို ဆောင်ရွက်ပြီး ပူးပေါင်း ဆောင်ရွက်မှုဖြင့် စိန်ခေါ်မှုများကို အားသွန်ခွန်စိုက် ရင်ဆိုင်ကျော်လွှားကြရန် လိုအပ်ကြောင်းလည်း ပြည်ထောင်စု ဝန်ကြီးက ပြောကြားခဲ့သည်။