သန့်မင်းအိမ် (NSS) - အောက်တိုဘာ ၃

မန္တလေးငလျင်ကြီးဒဏ်ခံခဲ့ရသည့် နယ်မြေဒေသများ ပြန်လည်ထူထောင်ရေးအတွက် နိုင်ငံတော်မှ ထည့်ဝင်ပံ့ပိုး သည့်ရန်ပုံငွေဖြင့် စုစုပေါင်းချေးငွေ (၁၂) ခု၊ ငွေပမာဏ ကျပ် (၈)  ဘီလျံကျော် ထုတ်ချေးပေးထားပြီးဖြစ်ကြောင်း ရန်ပုံငွေကြီးကြပ်မှုဗဟိုကော်မတီဥက္ကဋ္ဌ၊ မြန်မာနိုင်ငံတော်ဗဟိုဘဏ်ဥက္ကဋ္ဌ ဒေါက်တာခင်နိုင်ဦး၏ ပြောကြားချက် အရ သိရသည်။

လယ်ယာကဏ္ဍဖွံ့ဖြိုးတိုးတက်မှုမှသည် နိုင်ငံ့ထုတ်ကုန်တိုးတက်မှုသို့” အမျိုးသားအဆင့်အလုပ်ရုံဆွေးနွေးပွဲမှ ထွက်ပေါ်လာသည့် ရလဒ်များအပေါ် အကောင်အထည်ဖော်ဆောင်ရွက်မည့်လုပ်ငန်းစဉ်များ ချမှတ်နိုင်ရေး အတွက် မြန်မာနိုင်ငံတော်ဗဟိုဘဏ်နှင့် မြန်မာနိုင်ငံဘဏ်များအသင်းတို့ ညှိနှိုင်းအစည်းအဝေးကို ယမန်နေ့ (အောက်တိုဘာ ၂ ရက်) နံနက် (၉) နာရီခွဲတွင် မြန်မာနိုင်ငံတော်ဗဟိုဘဏ် နေပြည်တော် ဇမ္ဗူသီရိခန်းမ၌ ကျင်းပခဲ့ ကြောင်း သိရသည်။

အဆိုပါ ချေးငွေများကို ငလျင်ကြောင့် ထိခိုက်ပျက်စီးခဲ့သည့် နိုင်ငံ့ဝန်ထမ်းများ၏ နေအိမ်များနှင့် MSME လုပ်ငန်းများ၊ စက်ရုံလုပ်ငန်းကြီးများ၊ ဟိုတယ်နှင့်ပညာရေးဆိုင်ရာလုပ်ငန်းများ ပြန်လည်ထူထောင်နိုင်ရေး အတွက် ပံ့ပိုးပေးထားခြင်းဖြစ်ပြီး Home Loan၊ Reconstruction Loan၊ Working Capital Loan နှင့် Fixed Capital Loan စသည့် ချေးငွေအမျိုးအစားများ ပါဝင်ကြောင်းသိရသည်။

ပြန်လည်ထူထောင်ရေးရန်ပုံငွေ ကြီးကြပ်မှုဗဟိုကော်မတီ (၃/၂၀၂၆) အစည်းအဝေးတွင် ရန်ပုံငွေကြီးကြပ်မှု ဗဟိုကော်မတီဥက္ကဋ္ဌ၊ မြန်မာနိုင်ငံတော်ဗဟိုဘဏ်ဥက္ကဋ္ဌ ဒေါက်တာခင်နိုင်ဦးက အဆိုပါချေးငွေများကို ရန်ပုံငွေ စီမံခန့်ခွဲမှုလုပ်ငန်းအဖွဲ့မှ စိစစ်တင်ပြလာသည့် ချေးငွေများအပေါ် ချေးငွေဆိုင်ရာ စံပြုလုပ်ငန်းစဉ် SOP ပါ စံသတ်မှတ်ချက်များနှင့်အညီစိစစ်၍ ထုတ်ချေးပေးလျက်ရှိရာတွင် စုစုပေါင်းချေးငွေ (၁၂) ခု၊ ပမာဏ ကျပ် (၈ ဒသမ ၁၁) ဘီလျံကို ထုတ်ချေးနိုင်ခဲ့ပြီးဖြစ်ကြောင်းထုတ်ပြန်ချက်အရသိရသည်။

ထို့ပြင် ငလျင်ဘေးကြောင့် ထိခိုက်ပျက်စီးမှုများ ပြန်လည်ထူထောင်နိုင်ရေးအတွက် အတိုးနှုန်းသက်သာစွာဖြင့် ပံ့ပိုးပေးသည့် အထူးချေးငွေအစီအစဉ်ဖြစ်သဖြင့် ရည်ရွယ်ချက်အတိုင်း အောင်မြင်စွာ အကောင်အထည်ဖော်နိုင်ရေး အဖွဲ့ဝင်များအားလုံး ပူးပေါင်းဆောင်ရွက်ရန် လိုအပ်ကြောင်း ၎င်းက ပြောသည်

ယင်းအစည်းအဝေးတွင် ခွင့်ပြုထားသည့် ဘဏ်များအနက် ဘဏ် (၅) ဘဏ်မှ တင်ပြလာသည့် နိုင်ငံ့ဝန်ထမ်း တစ်ဦးနှင့် လုပ်ငန်းကိုးခုအပါအဝင် စုစုပေါင်းချေးငွေ (၁၀) ခုအတွက် ချေးငွေပမာဏ ကျပ် (၂၄) ဒသမ (၇၅) ဘီလျံကိုလည်း စိစစ်အတည်ပြုခဲ့ကြောင်း သိရသည်။