စိမ့်စမ်းရေ (NSS) - အောက်တိုဘာ ၃

မွန်ပြည်နယ်၊ ကျိုက်ထိုမြို့နယ်ရှိ ၃၃/၁၁ ကေဗွီ၊ ၅ အမ်ဗွီအေ ဆောင်နိုင်ကြီးဓာတ်အားခွဲရုံ၏ ဓာတ်အားထိန်းချုပ် ခန်းကို အကြမ်းဖက်သောင်းကျန်းသူများက Drop Bomb (၂) လုံးဖြင့် ပစ်ချတိုက်ခိုက်ခဲ့ကြောင်း လျှပ်စစ်နှင့် စွမ်းအင်ဝန်ကြီးဌာန၏ ထုတ်ပြန်ချက်အရ သိရသည်။

ဖြစ်စဉ်မှာ ပြီးခဲ့သည့် စက်တင်ဘာ (၃၀) ရက် ည (၁၂) နာရီ (၁၀) မိနစ်တွင် ဖြစ်ပွားခဲ့ခြင်းဖြစ်ပြီး Drop Bomb များ ပေါက်ကွဲမှုကြောင့် ဓာတ်အားထိန်းချုပ်ခန်း၏ နံရံများ၊ ခေါင်မိုးရှိ သွပ်ပြားများ၊ မျက်နှာကြက်နှင့် ပြတင်းတံခါး ပေါက်မှန်များ ပျက်စီးခဲ့ကြောင်း သိရသည်။

ထို့ပြင် ၃၃ ကေဗွီနှင့် ၁၁ ကေဗွီ ထိန်းချုပ်ရေးခလုတ်ပုံးများ ဗုံးစထိမှန်ပျက်စီးခြင်း၊ ထိန်းချုပ်ကေဘယ်လ်ကြိုးများ ပျက်စီးခြင်းနှင့် ဓာတ်အားပြတ်တောက်မှုများ ဖြစ်ပေါ်ခဲ့ကြောင်း သိရသည်။

ထို့ကြောင့် အဆိုပါဓာတ်အားခွဲရုံမှ ဓာတ်အားဖြန့်ဖြူးပေးထားသည့် ကင်မွန်းစခန်းဓာတ်အားခွဲရုံကို ၃၃ ကေဗွီ ကျိုက်ထိုဓာတ်အားလိုင်းဖြင့် ပြောင်းလဲချိတ်ဆက်ပြီး ပြီးခဲ့သည့် အောက်တိုဘာ (၁) ရက် နံနက် (၉) နာရီ (၅၅) မိနစ်တွင် ဓာတ်အားပြန်လည်ဖြန့်ဖြူးပေးနိုင်ခဲ့ကြောင်း သိရသည်။

လက်ရှိတွင် ဆောင်နိုင်ကြီး၊ မဲရုံးကြီး၊ မဲရုံးလေးနှင့် ဝင်းကလောကျေးရွာများမှာ ဓာတ်အားပြတ်တောက်လျက်ရှိပြီး ဒေသခံပြည်သူများထံ ဓာတ်အားအမြန်ဆုံး ပြန်လည်ဖြန့်ဖြူးပေးနိုင်ရေးအတွက် လျှပ်စစ်ဝန်ထမ်းများက ဆောင်ရွက်လျက်ရှိကြောင်း သိရသည်။