Pika(NSS)- အောက်တိုဘာ ၂

အင်္ဂလန်နိုင်ငံ အနောက်တောင်ပိုင်းရှိ RAF Fairford လေတပ်စခန်းအနီးတွင် မကြာသေးမီကဖြစ်ပွားခဲ့သည့် လုံခြုံရေးဆိုင်ရာစိုးရိမ်ဖွယ်ရာဖြစ်ရပ်တစ်ခုတွင် အီရန်ပါဝင်ပတ်သက်နေသည်ဆိုသည့် ဗြိတိန်ဝန်ကြီးချုပ် Andy Burnham၏ ပြောဆိုချက်များကို အီရန်နိုင်ငံခြားရေးဝန်ကြီး အာဘတ်စ်အာဂရာချီက ငြင်းဆန်ပယ်ချခဲ့ကြောင်းသိရသည်။အီရန်အပေါ်လုပ်ဆောင်နေသည့်စစ်ဆင်ရေးများတွင် အသုံးပြုသော အမေရိကန်၏ဗုံးကြဲလေယာဉ်များကို လက်ခံထားသည့် စစ်ဘက်ဆိုင်ရာအဆောက်အဦးအနီးတွင် ရဲတပ်ဖွဲ့က အမျိုးသား(၅)ဦးကိုဖမ်းဆီးခဲ့ပြီး သံသယရှိသူများမှာ အသက်(၂၀)နှစ်ကျော်အရွယ် ဗြိတိန်နိုင်ငံသားများဖြစ်ကြကာ နောက်တစ်နေ့တွင် အာမခံဖြင့်ပြန်လွတ်လာခဲ့ကြောင်းသိရသည်။ Andy Burnhamက” RAF Fairford လေတပ်စခန်းအနီးမှာဖြစ်ပွားခဲ့တဲ့ ဖြစ်ရပ်မှာ အီရန်က ပါဝင်ပတ်သက်နေတယ်ဆိုတဲ့ ခိုင်လုံတဲ့အရိပ်အယောင်တွေရှိနေပါတယ်။”ဟုပြောဆိုခဲ့သည်။အဆိုပါပြောဆိုမှုက ဗြိတိန်အာဏာပိုင်များအနေဖြင့် RAF Fairfordလေတပ်စခန်းအနီးတွင်ဖြစ်ပွားခဲ့သောဖြစ်ရပ်မှာ နိုင်ငံခြားအဖွဲ့အစည်းတစ်ခုခုနှင့် ပတ်သက်ဆက်နွယ်မှုရှိကြောင်းကို လူသိရှင်ကြားထုတ်ဖော်ပြောဆိုခဲ့သည့် ပထမဆုံးအကြိမ်ပြောဆိုမှုဖြစ်လာကြောင်းသိရသည်။သို့သော်လည်း Andy Burnhamက နောက်ထပ်အသေးစိတ်အချက်အလက်များကို ထုတ်ဖော်ပြောဆိုခြင်းမျိုးမရှိတော့ဘဲ သင့်လျော်သည့်အချိန်မှသာထပ်မံပြောပြသွားမည်ဖြစ်ကြောင်း ကတိပြုပြောဆိုခဲ့သည်။ထို့နောက် ဗြိတိန်တွင်ရှိသည့် အီရန်သံရုံးက RAF Fairford လေတပ်စခန်းအနီးတွင်ဖြစ်ပွားခဲ့သော ဖြစ်ရပ်တွင် အီရန်ပါဝင်ပတ်သက်နေသည်ဆိုသည့်ပြောဆိုချက်များကို ပြင်းပြင်းထန်ထန်ငြင်းဆန်ပယ်ချခဲ့ပြီး ဗြိတိန်အစိုးရက အီရန်အပေါ်ကြောက်ရွံ့မုန်းတီးမှုဖြစ်အောင် လှုံ့ဆော်နေခြင်းဖြစ်ကြောင်း ဝေဖန်ပြောဆိုခဲ့သည်။အမေရိကန်သမ္မတဒေါ်နယ်ထရမ့်ကလည်း သံသယရှိသူများကို ပြန်လွှတ်ပေးခဲ့သည့် Andy Burnham၏ ဆုံးဖြတ်ချက်များကို မေးခွန်းထုတ်ခဲ့ပြီး ၎င်းသာဆိုပါက အာမခံနဲ့ပြန်မလွှတ်ပေးရန် ပြောလိမ့်မည်ဟု ထုတ်ဖော်ပြောဆိုခဲ့သည်။