သန့်မင်းအိမ်(NSS) - နိုဝင်ဘာ ၂

ယခင်က မြန်မာ့ပြောင်းဆံများကို ပြည်ပ (၁၀) နိုင်ငံသို့ တင်ပို့ရောင်းချနိုင်ခဲ့သော်လည်း လက်ရှိတွင် ပြည်ပ (၃) နိုင်ငံသို့သာ တင်ပို့နေရပြီး ထိုင်းနိုင်ငံဈေးကွက်ကို အဓိကမှီခိုနေရကြောင်း မြန်မာနိုင်ငံ ပြောင်းလုပ်ငန်းအသင်း ဥက္ကဋ္ဌ ဦးအေးချမ်းအောင် က ပြောကြားခဲ့သည်ဟု မြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် (UMFCCI) ၏ အောက်တိုဘာ (၁) ရက် ထုတ်ပြန်ချက်အရသိရသည်။

မြန်မာနိုင်ငံ ပြောင်းလုပ်ငန်းအသင်း၏ ၂၀၂၅-၂၀၂၈ ခုနှစ် သက်တမ်း ပထမအကြိမ် နှစ်ပတ်လည်အသင်းသားစုံညီအစည်းအဝေးကို ပြီးခဲ့သည့် (စက်တင်ဘာ ၂၆ ရက်) နံနက်ပိုင်းတွင် ရန်ကုန်မြို့၊ လမ်းမတော်မြို့နယ်၊ မင်းရဲကျော်စွာလမ်းရှိ ကုန်သည်စက်မှုအသင်းချုပ် မင်္ဂလာခန်းမ၌ ကျင်းပခဲ့ကြောင်းသိရသည်။

အစည်းအဝေးတွင် မြန်မာနိုင်ငံ ပြောင်းလုပ်ငန်းအသင်း ဥက္ကဋ္ဌ ဦးအေးချမ်းအောင်က အဖွင့်အမှာစကားပြောကြားခဲ့ပြီး UMFCCI ဥက္ကဋ္ဌ ဦးအေးဝင်းနှင့် မြန်မာနိုင်ငံ ပြောင်းလုပ်ငန်းအသင်း နာယက ဦးမင်းခိုင်တို့က အမှာစကားများ ပြောကြားခဲ့သည်။

ဦးအေးချမ်းအောင်က ပြောင်းလုပ်ငန်းကဏ္ဍနှင့် ပတ်သက်၍ ပြောကြားရာတွင် ယခင်နှစ်များက မြန်မာနိုင်ငံ၏ ပြောင်းဆံထွက်ရှိမှုသည် တန်ချိန် (၃) သန်းကျော်ရှိခဲ့သော်လည်း အကြောင်းအမျိုးမျိုးကြောင့် ပြောင်းစိုက်ပျိုးထုတ်လုပ်မှု လျော့ကျခဲ့ပြီး လက်ရှိတွင် တန်ချိန် (၂) သန်းခွဲကျော်သာ ထွက်ရှိနိုင်ကြောင်း ပြောကြားသည်။

ယခင်က ပြောင်းဆံတန်ချိန် ၃ သန်းကျော် ထွက်ရှိချိန်တွင် ပြည်တွင်းသုံးစွဲမှု တန်ချိန် (၁) သန်းခန့်ရှိပြီး ပြည်ပသို့ တန်ချိန် (၂) သန်းခန့် တင်ပို့နိုင်ခဲ့ကြောင်း ထုတ်ပြန်ချက်အရသိရသည်။

ယခင်ဈေးကွက်အခြေအနေအရ ထွက်ရှိသည့် ပြောင်းဆံများကို ပြည်ပ (၁၀) နိုင်ငံသို့ တင်ပို့ရောင်းချနိုင်ခဲ့သော်လည်း လက်ရှိတွင် ပြည်ပ (၃) နိုင်ငံသို့သာ တင်ပို့နေရပြီး ထိုင်းနိုင်ငံဈေးကွက်ကိုသာ အဓိကမှီခိုနေရကြောင်း ၎င်း၏ပြောကြားချက်အရသိရသည်။

ပြောင်းသည် ပြည်တွင်းမွေးမြူရေးကဏ္ဍနှင့် အစာစက်ရုံများအတွက် မရှိမဖြစ်လိုအပ်သည့် ကုန်ကြမ်းဖြစ်သည့်အတွက် ပြောင်းကဏ္ဍတစ်ရပ်လုံးကို ယခုထက်ပိုမိုခိုင်မာလာအောင် လုပ်ဆောင်ရန်လိုအပ်ကြောင်း နှင့် ပြည်ပတင်ပို့မည့် ပြောင်းပမာဏနှင့် ပြည်တွင်းသုံးစွဲမည့် ပမာဏတို့ကို ညှိနှိုင်းသတ်မှတ်ပြီး သက်ဆိုင်ရာဝန်ကြီးဌာနများသို့ အစီရင်ခံစာပေးပို့ရန် လိုအပ်ကြောင်းနှင့် အသင်းချုပ်ဘက်မှ လိုအပ်သည်များကို ပံ့ပိုးကူညီသွားမည်ဖြစ်ကြောင်း အဆိုပါ အစည်းအဝေးတွင် မြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် (UMFCCI) ဥက္ကဋ္ဌ ဦးအေးဝင်းက ပြောသည်။