Pika (NSS)- အောက်တိုဘာ ၂

အသက်(၁၀၁)နှစ်အရွယ် မလေးရှားဝန်ကြီးချုပ်ဟောင်း မဟာသီယာမိုဟာမက်သည် နှစ်ပေါင်း(၇၀)ကျော်ကြာပေါင်းသင်းခဲ့သော ဇနီးဖြစ်သူကွယ်လွန်ပြီး တစ်ရက်အကြာတွင် ကျန်းမာရေးစောင့်ကြည့်စစ်ဆေးကုသမှုများခံယူရန်အတွက် ဆေးရုံတက်ခဲ့ရကြောင်းသိရသည်။

မလေးရှားဝန်ကြီးချုပ်အဖြစ် နှစ်ကြိမ်တိုင်တိုင် တာဝန်ထမ်းဆောင်ဖူးသည့် မဟာသီယာမိုဟာမက်သည် ကွာလာလမ်ပူမြို့ရှိ အမျိုးသားနှလုံးရောဂါကုဌာနတွင် ဆေးရုံတက်ခဲ့ခြင်းဖြစ်ပြီး ရောဂါရှာဖွေတွေ့ရှိချက် မထွက်ပေါ်မီအချိန်အထိ ဆေးရုံတက်ရသည့်အကြောင်းအရင်းများကို တိတိကျကျမသိရှိရသေးကြောင်း လက်ထောက်ဖြစ်သူ ဆူဖီယိုဆွတ်ဖ်ကပြောကြားခဲ့သည်။စက်တင်ဘာလ(၂၈)ရက်နေ့က ဇနီးဖြစ်သူစီတီဟာစ်မာမိုဟာမက်အလီ ကွယ်လွန်သွားပြီးနောက်ပိုင်းတည်းက ပူဆွေးနေသောမဟာသီယာမိုဟာမက်က အနားယူချိန်မလုံလောက်မှုများရှိခဲ့ကာ မောပန်းနွမ်းနယ်မှုကို ခံစားနေရကြောင်း ဆူဖီယိုဆွတ်ဖ်ကပြောကြားခဲ့သည်။

ဆူဖီယိုဆွတ်ဖ်က”ဒါပေမဲ့ မဟာသီယာမိုဟာမက်ရဲ့ ကျန်းမာရေးအခြေအနေကတော့ တည်ငြိမ်နေပါတယ်။စိတ်ခံစားမှုဆိုင်ရာ  အတက်အကျတွေ၊ပူပြင်းတဲ့ရာသီဥတုနဲ့အနားယူချိန်မလုံလောက်မှုတွေကြောင့် မဟာသီယာမိုဟာမက် အရမ်းပင်ပန်းနွမ်းနယ်နေတာပါ။အသက်(၁၀၁)နှစ်အရွယ် လူတစ်ယောက်အတွက်တော့ ဒီအချက်တွေအားလုံးက  မကောင်းတဲ့ပေါင်းစပ်မှုမျိုးဖြစ်နေပါတယ်”ဟုပြောဆိုခဲ့သည်။

မဟာသီယာမိုဟာမက်၏ ဇနီးသည် စီတီဟာစ်မာမိုဟာမက်အလီသည် ဆရာဝန်တစ်ဦးဖြစ်ပြီး ကွယ်လွန်သွားသည့်အချိန်တွင် အသက်(၁၀၀)နှစ်ရှိပြီဖြစ်ကာ သားသမီးစုစုပေါင်း(၇)ဦးရှိကြောင်းသိရသည်။

မကြာသေးမီနှစ်များအတွင်း မဟာသီယာမိုဟာမက်သည် နှလုံးရောဂါပြဿနာများစွာကိုခံစားခဲ့ရပြီး နှလုံးသွေးကြောအစားထိုးခွဲစိတ်ကုသမှုများလည်း ခံယူခဲ့ဖူးကြောင်းသိရသည်။

ထို့ပြင် မဟာသီယာမိုဟာမက်သည် ပြီးခဲ့သည့်နှစ်များအတွင်း ဆေးရုံအကြိမ်ကြိမ်တက်ခဲ့ရပြီး ပြီးခဲ့သည့်ဇန်နဝါရီကလည်း လဲကျမှုကြောင့် တင်ပါးဆုံရိုးကျိုးသွားခဲ့ပြီးနောက် ဆေးရုံတက်ခဲ့ရကြောင်းလည်းသိရသည်။

မဟာသီယာမိုဟာမက်သည် (၁၉၈၁)ခုနှစ်မှ (၂၀၀၃)ခုနှစ်အထိ မလေးရှားဝန်ကြီးချုပ်အဖြစ်တာဝန်ထမ်းဆောင်ခဲ့ပြီး အသက်(၉၂)နှစ်အရွယ်ဖြင့် (၂၀၁၈)ခုနှစ်မှ (၂၀၂၀)ခုနှစ်အထိ ဝန်ကြီးချုပ်အဖြစ် ဒုတိယအကြိမ်ထပ်မံတာဝန်ထမ်းဆောင်ခဲ့ကာ ကမ္ဘာ့အသက်အကြီးဆုံးဝန်ကြီးချုပ်အဖြစ် သတ်မှတ်ခံထားရကြောင်းလည်းသိရသည်။