Pika (NSS)- အောက်တိုဘာ ၁

ထိုင်းနိုင်ငံမှာဖြစ်ပွားနေတဲ့ ရေကြီးမှုတွေကြောင့် Toyotaစက်ရုံလေးရုံကို ယာယီပိတ်ထားရပြီး အဓိကလေကြောင်းလိုင်းဖြစ်တဲ့ Thai Airwaysရဲ့ ကုန်စည်သယ်ယူပို့ဆောင်ရေးလုပ်ငန်းတွေကိုလည်း ရပ်ဆိုင်းထားရတယ်လို့ သိရပါတယ်။

ထိုင်းနိုင်ငံဟာ လာမယ့်သီတင်းပတ်တွေအတွင်း နောက်ထပ်မိုးသည်းထန်စွာရွာသွန်းမှုကို ရင်ဆိုင်ရဖွယ်ရှိနေတယ်လို့လည်းသိရပါတယ်။

လာမယ့်အောက်တိုဘာလ(၅)ရက်ကနေ(၈)ရက်အထိ မိုးသည်းထန်စွာရွာသွန်းနိုင်ပြီး ထိုင်းနိုင်ငံရဲ့အရှေ့မြောက်ပိုင်းနဲ့ မြောက်ပိုင်းတို့မှာ မိုးသည်းထန်စွာရွာသွန်းမှုက ပိုမိုဖြစ်လာနိုင်ခြေရှိနေတယ်လို့လည်း သိရပါတယ်။

ဘန်ကောက်မြို့မှာ သုံးရက်အတွင်း မိုးရေချိန်(၃၂၀)မီလီမီတာရွာသွန်းခဲ့ပြီးနောက် ဘေးအန္တရာယ်ဇုန်အဖြစ် အာဏာပိုင်တွေက ပြီးခဲ့တဲ့ရက်ပိုင်းမှာ ထုတ်ပြန်ကြေညာခဲ့တာလည်းဖြစ်ပါတယ်။

ဒါ့ပြင် ဘန်ကောက်မြို့နဲ့ဆက်စပ်ဧရိယာတွေအပြင် ထိုင်းနိုင်ငံအလယ်ပိုင်းဒေသတွေဟာ မြောက်ပိုင်းကနေစီးဆင်းလာတဲ့ ရေဘေးအန္တရာယ်တွေနဲ့ ဆက်လက်ရင်ဆိုင်နေရဆဲဖြစ်တယ်လို့ ထိုင်းဝန်ကြီးချုပ် အနုတင်ချာန်ဗီရာကူးလ်ကပြောကြားခဲ့ပြီး အခြေအနေတွေကိုစောင့်ကြည့်ဖို့အတွက် အထူးအဖွဲ့တစ်ခုကိုဖွဲ့စည်းထားတယ်လို့လည်း ပြောကြားခဲ့ပါတယ်။

ရေကြီးမှုတွေကြောင့် ဝန်ဆောင်မှုလုပ်ငန်းတွေ၊လက်လီနဲ့လက်ကားရောင်းချမှုလုပ်ငန်းတွေအပြင် ဆောက်လုပ်ရေးလုပ်ငန်းတွေပါ ထိခိုက်မှုရှိခဲ့ပေမယ့်လည်း ကုန်ထုတ်လုပ်မှုကဏ္ဍအပေါ် ကျယ်ကျယ်ပြန့်ပြန့် ထိခိုက်တာမျိုးမရှိသေးဘူးလို့လည်း ထိုင်းဗဟိုဘဏ်ဒုအုပ်ချုပ်ရေးမှူး ချာယာဝါဒီချိုင်အန်နက်ကပြောကြားခဲ့ပါတယ်။

ဒါပေမယ့်လည်း ရေကြီးမှုကြောင့် စက်ပစ္စည်းအစိတ်အပိုင်းတွေပေးပို့ရာမှာ အနှောင့်အယှက်တွေဖြစ်ပေါ်ခဲ့ရတဲ့အတွက် Toyota ကုမ္ပဏီက ၎င်းရဲ့စက်ရုံလေးရုံကို ပိတ်ထားရတယ်လို့လည်း ချာယာဝါဒီချိုင်အန်နက်ကပြောကြားခဲ့ပါတယ်။

ဝန်ထမ်းအများအပြားက လုပ်ငန်းခွင်ကိုသွားရောက်နိုင်တာမျိုးမရှိတာကြောင့် အဓိကလေကြောင်းလိုင်းဖြစ်တဲ့ Thai Airwaysက စက်တင်ဘာလ(၃၀)ရက်နေကနေစတင်ပြီး အောက်တိုဘာလ(၆)ရက်အထိ ဝင်/ထွက်ကုန်စည်သယ်ယူပို့ဆောင်ရေးလုပ်ငန်းတွေကို ရပ်ဆိုင်းထားခဲ့ရတယ်လို့သိရပါတယ်။