သန့်မင်းအိမ် (NSS) - စက်တင်ဘာ ၁၂

ချင်းပြည်နယ်၊ ဖလမ်းခရိုင်၊ ဖလမ်းမြို့တွင် ယနေ့ စက်တင်ဘာ (၁၂) ရက်မှစတင်၍ မြန်မာ့ဆက်သွယ်ရေးလုပ်ငန်း (MPT) ၏ ဆက်သွယ်ရေးကွန်ရက်လိုင်းများ ပြန်လည်အသုံးပြုနိုင်ပြီဖြစ်ကြောင်း သိရသည်။

ဖလမ်းမြို့နှင့် တွန်းဇံမြို့တို့တွင် MPT ဆက်သွယ်ရေးလိုင်းများ အမြန်ဆုံးပြန်လည်အသုံးပြုနိုင်ရေးအတွက် လိုအပ်သည့် ဆက်သွယ်ရေးစက်ပစ္စည်းများကို ရန်ကုန်မြို့မှ မော်တော်ယာဉ်နှင့် လေယာဉ်များဖြင့် အဆင့်ဆင့် သယ်ယူပို့ဆောင်ခဲ့ခြင်းဖြစ်ကြောင်း သိရသည်။

လက်ရှိတွင် ဖလမ်းမြို့၌ လိုအပ်သည့် ဆက်သွယ်ရေးစက်ပစ္စည်းများ တပ်ဆင်ခြင်းလုပ်ငန်းများ ဆောင်ရွက်ပြီးစီးပြီဖြစ်ပြီး MPT ဆက်သွယ်ရေးလိုင်းများ ပြန်လည်ရရှိလာကာ ဒေသခံပြည်သူများ လွယ်ကူစွာ ဆက်သွယ်ပြောဆိုနိုင်ပြီဖြစ်ကြောင်း သိရသည်။

ဆက်လက်၍ တွန်းဇံမြို့တွင်လည်း ဆက်သွယ်ရေးလိုင်းများ အမြန်ဆုံးပြန်လည်ရရှိနိုင်ရေးအတွက် MPT ဝန်ထမ်းများက လိုအပ်သည့်စက်ပစ္စည်းများ တည်ဆောက်တပ်ဆင်ခြင်းလုပ်ငန်းများကို ဆက်လက်ဆောင်ရွက်လျက်ရှိကြောင်း သိရသည်။

မြန်မာဆက်သွယ်ရေးလုပ်ငန်း (MPT) အနေဖြင့် ချင်းပြည်နယ်အတွင်း ဆက်သွယ်ရေးကွန်ရက်များ ပြန်လည်ရရှိရေးကို အထူးအလေးထား၍ အရှိန်အဟုန်မြှင့် ဆောင်ရွက်လျက်ရှိရာ လက်ရှိတွင် ဖလမ်းမြို့နှင့် တီးတိန်မြို့တို့၌ MPT ဆက်သွယ်ရေးကွန်ရက်လိုင်းများ ပြန်လည်ရရှိပြီဖြစ်ကြောင်း သိရသည်။