သန့်ဇင် (NSS) - စက်တင်ဘာ ၈

ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြို့နယ်ရှိ ငဝန်တာကျိုးပေါက်ပြီး (၄၁) ရက်အကြာတွင် ရေဝင်လမ်းကြောင်း ပိတ်ဆို့နိုင်ခဲ့ပြီဖြစ်ကြောင်း ဧရာဝတီတိုင်းဒေသကြီးအစိုးရအဖွဲ့၏ ထုတ်ပြန်ချက်အရ သိရသည်။

မိုးသည်းထန်စွာရွာသွန်းမှုနှင့် ငဝန်မြစ်ရေမြင့်တက်လာမှုကြောင့် ငဝန်တာ၏ အောက်ခံမြစ်ကျိုးအင်း သဲကြောမှ ထူးပေါက်၍ ရေဖြတ်သန်းစီးဆင်းမှုကြောင့် တာတမံ နိမ့်ကျပြီး ရေကျော်စီးဝင်မှုသည် ဇူလိုင်လ (၃၀) ရက် ည (၁၀) နာရီ (၄၂) မိနစ်တွင် စတင်ဖြစ်ပေါ်ခဲ့ကြောင်း သိရသည်။

ထို့နောက် တာတမံ အရေးပေါ်ကာကွယ်ရေးလုပ်ငန်းနှင့် ရေဝင်လမ်းကြောင်း ပိတ်ဆို့ရေးလုပ်ငန်းများကို ဩဂုတ်လ(၄) ရက်မှစတင် ဆောင်ရွက်ခဲ့ရာ Steel Sheet Pile များ ရိုက်သွင်း၍ ကာရံခြင်းလုပ်ငန်းများ အပြီးသတ် ရိုက်သွင်းပြီး ယနေ့(စက်တင်ဘာ ၈ ရက်) တွင် ရေဝင်လမ်းကြောင်းကို ထိန်းချုပ်နိုင်ခဲ့ကြောင်း သိရသည်။ “ဟုတ်ပါတယ်။ ဒီနေ့တားနိုင်သွားပါပြီ” ဟု ဧရာဝတီတိုင်းဒေသကြီးအစိုးရအဖွဲ့နှင့်နီးစပ်သူ သတင်းရင်းမြစ်က NP News ကို ပြောသည်။

ဆက်လက်၍ ကာရံပိတ်ဆို့ပြီးသော Steel Sheet Pile များအား အတွင်းအပြင်ရေမျက်နှာပြင်ကွာခြားလာမှုကြောင့် ပြင်ပရေတွန်းအား ဖြစ်ပေါ်လာမှုအား ခံနိုင်ရည်ရှိရန်အတွက် Jumbo Bags(သဲအိတ်)များ ဆက်လက်ချခြင်း၊ သဲအိတ်များကာရံခြင်းနှင့်သောင်တူး ရေယာဉ်ဖြင့် ရေနက်အိုးအတွင်းသို့ သဲမှုတ်ထည့်ခြင်း၊ Sheet Pile များအားခိုင်မာမှုရှိစေရန် Concrete Sinker အတုံးများချခြင်း၊ သံမဏိဒေါက်တိုင်များ ထပ်မံကျားကန်ထောက်ပေးခြင်းလုပ်ငန်းများ ဆက်လက်ဆောင်ရွက်မည်ဖြစ်ကြောင်းလည်း သိရသည်။

ငဝန်ရေကာတာသည် လေးမျက်နှာမြို့နယ်အတွင်း တာမိုင် ၁၉/၁ မှ ၃၉/၀ အထိ မိုင် (၂၀) ခန့်ရှည်လျားပြီး မြို့ပေါ်ရပ်ကွက် (၅) ခုနှင့်ကျေးရွာအုပ်စု (၂၁) အုပ်စုတို့ကို ကာကွယ်ထားရာ အဆိုပါနေရာတွင် ရေကျော်စီးဝင်မှု စတင်ခဲ့သဖြင့် ပြည်သူများအား ယာယီရေရှောင်စခန်းများကို အချိန်မီ ပို့ဆောင်ပေးနိုင်ခဲ့ခြင်းဖြစ်ကြောင်း သိရသည်။ ရေဝင်လမ်းကြောင်းပိတ်ဆိုရာတွင် Geo-bags အိတ်ကြီးများချခြင်း၊ ပန်းတာ၏ လက်ဝဲဘက်ခြမ်းနှင့် လက်ယာဘက်ခြမ်းတို့တွင် ရေတိုက်စားမှုမှကာကွယ်ရန် သဲအိတ် (၁၀၀) ပါ နိုင်လွန်ပိုက်ကြိုးဖြင့်ထုပ်ပိုးထားသည့် သဲအိတ်တွဲများချခြင်း၊ ဧရာမောင်သောင်တူးစက်ကြီး ရေယာဉ်တွဲဖြင့် သဲတူးဖော်ပြီး ပန်းတာရေဝင်လမ်းအနီးသို့ သဲမှုတ်သွင်းခြင်း၊ ပန်းတာရေဝင်လမ်း ပိတ်ဆို့ ကာကွယ်ရန်အတွက် ဒဂုန်စာမရီ ရေယာဉ်နှင့် မြဟန်တိုး ရေယာဉ်တို့ဖြင့် Geo-bags အိတ်များချခြင်း၊ ရွှေစင်ကြယ်နှင့် ရွှေနန်းတော် ဆောက်လုပ်ရေးရေယာဉ်များက Steel Sheet Pile များကို ကရိန်းနှင့် Silent Pile Driver, Electric Vibratory Pile Hammer များ အသုံးပြု၍ ရိုက်သွင်းခြင်းတို့ဆောင်ရွက်ခဲ့ကြောင်း သိရသည်။

ထို့ပြင် Steel Sheet Pile ပိုမိုတည်ငြိမ်ခိုင်ခံ့စေရန် အနောက်ဘက်မှ ထောက်ကန်ပေးနိုင်ရေး အတွက် သဲအိတ်များချခြင်း၊ Split Barge ရေယာဉ်ဖြင့် ရေယာဉ်အလယ်ပိုင်းမှ ဝမ်းဖွင့်ချသည့် စနစ်ကို အသုံးပြု၍ Geo-Bag သဲအိတ်ကြီးများချခြင်း၊ ရေဝင်လမ်း ပိတ်ဆို့ကာကွယ်ရန် CB တွဲခွံ ၈၀ ပေ × ၁၈ ပေ × ၉ ပေ အတွင်း သဲ၊ ကျောက် ထည့်သွင်း နစ်မြုပ်ဆောင်ရွက်ခဲ့ပြီး လိုအပ်သော စက်ယန္တရားများအကူအညီဖြင့် နေ့ရောညပါ အရှိန်အဟုန်မြှင့်တင် ဆောင်ရွက်ခဲ့ခြင်းဖြစ်ကြောင်း သိရသည်။