စိမ့်စမ်းရေ (NP News)-ဖေဖော်ဝါရီ ၁၄

နေပြည်တော်ရင်ပြင်၌ ဖေဖော်ဝါရီ (၈) ရက်မှ (၁၄) ရက်အထိ ကျင်းပလျက်ရှိသော ပြည်ထောင်စုအဆင့် MSME ထုတ်ကုန်ပြပွဲနှင့် ဈေးရောင်းပွဲတော်အတွင်း ပါဝင်ပြသလျက်ရှိသည့် လုပ်ငန်း/စီးပွားချိတ်ဆက်ပြခန်းမှ ဖေဖော်ဝါရီ (၈) ရက်မှ (၁၃) ရက်အထိကာလအတွင်း MSME လုပ်ငန်းရှင် စုစုပေါင်း (၁၀၇၅) ဦးကို လုပ်ငန်းစီးပွားချိတ်ဆက် ဆောင်ရွက်ပေးနိုင်ခဲ့ကြောင်း သိရသည်။

အဆိုပါကာလအတွင်း ဝန်ကြီးဌာနများနှင့် ချိတ်ဆက်ရေးလုပ်ငန်းအဖွဲ့မှ MSME လုပ်ငန်းရှင် စုစုပေါင်း (၄၅၄) ဦးကို  ကုန်သွယ်ရေး၊ လိုင်စင်နှင့် သက်ဆိုင်ရာ ထောက်ခံချက်များဆိုင်ရာ ကိစ္စရပ်များကို ရှင်းလင်းဆောင်ရွက်ပေးခဲ့ကြောင်း သိရသည်။ 

ထို့ပြင် ပြည်တွင်းစျေးကွက် ချိတ်ဆက်ရေးလုပ်ငန်းအဖွဲ့မှ လက်လီ၊ လက်ကား ဆိုင်စုစုပေါင်း (၁၂) ဆိုင်နှင့် တွေ့ဆုံနိုင်ရေး စီစဉ်ပေးခဲ့ပြီး လုပ်ငန်းရှင် စုစုပေါင်း (၃၀၅) ဦးကို ချိတ်ဆက်ဆောင်ရွက်နိုင်ခဲ့ကြောင်း သိရသည်။

ရင်းနှီးမတည်ငွေ ချိတ်ဆက်ရေးလုပ်ငန်းအဖွဲ့မှလည်း ဘဏ်စုစုပေါင်း (၁၄) ခုနှင့် တွေ့ဆုံနိုင်ရေး ဆောင်ရွက်ပေးခဲ့ရာ လုပ်ငန်းရှင် စုစုပေါင်း (၂၃၄) ဦးကို ချိတ်ဆက်နိုင်ခဲ့ကြောင်း သိရသည်။ 

ထို့ပြင် ပြည်ပစျေးကွက် ချိတ်ဆက်ရေးလုပ်ငန်းအဖွဲ့မှ လုပ်ငန်းရှင် စုစုပေါင်း (၈၂) ဦးကို  နိုင်ငံပေါင်း (၁၂) နိုင်ငံတွင် တာဝန်ပေးစေလွှတ်ထားသည့် စီးပွားရေးသံမှူးများနှင့် ချိတ်ဆက်ဆောင်ရွက်ပေးခဲ့ကြောင်း သိရသည်။

အဆိုပါ လုပ်ငန်း၊ စီးပွားချိတ်ဆက် ပြခန်းတွင် MSME လုပ်ငန်းရှင်များ၏ ထုတ်ကုန်များကို လုပ်ငန်းစတင်တည်ထောင်သည့်အချိန်မှစ၍ ပြည်တွင်းစျေးကွက်ဝင်ရောက်ခြင်း၊ ပြည်ပစျေးကွက်သို့ တင်ပို့ရောင်းချနိုင်ရေးအထိ လိုအပ်သည့် လုပ်ငန်းဆိုင်ရာ လမ်းညွှန်မှုများ၊ လိုင်စင်နှင့် အသိအမှတ်ပြု လက်မှတ်များ ရရှိနိုင်ရေး၊ စျေးကွက်ချိတ်ဆက်မှုများနှင့် ရင်းနှီးမြှုပ်နှံမှုဆိုင်ရာ အခွင့်အလမ်းများကို တစ်နေရာတည်းတွင် ဆောင်ရွက်ပေးလျက်ရှိကြောင်း သိရသည်။

ပြပွဲကာလ ဆဋ္ဌမမြောက်နေ့ဖြစ်သည့် ယနေ့ (ဖေဖော်ဝါရီ ၁၄ရက်)တွင်လည်း သက်ဆိုင်ရာ ချိတ်ဆက်ရေးလုပ်ငန်းအဖွဲ့များမှ MSME လုပ်ငန်းရှင်များနှင့် ဆက်လက်တွေ့ဆုံ ဆောင်ရွက်ပေးလျက်ရှိကြောင်း သိရသည်။