ပြည့်ဖြိုး(NSS)- အောက်တိုဘာ  ၁၆

ကမ္ဘာရွှေဈေးမြင့်တက်မှုကြောင့် ပြည်တွင်းရွှေဈေး တစ်ကျပ်သားလျှင် ၈၇ သိန်းဝန်းကျင် ပေါက်ဈေး ရှိနေပြီး ရွှေရောင်းချသူများကိုခေါ်ယူဖမ်းဆီး စစ်ဆေးမည်ဟု သတင်းများထွက်ပေါ်နေကြောင်း ရွှေဈေးကွက် အတွင်းမှသိရသည်။

ယနေ့ အောက်တိုဘာ ၁၆ ရက်တွင် ကမ္ဘာ့ရွှေဈေးကွက်အတွင်း ရွှေတစ်အောင်စလျှင် ၄၂၃၀ ဒေါ်လာ ဝန်းကျင်ပေါက်ဈေးအထိမြင့်တက်နေရာ ပြည်တွင်းရွှေဈေးကွက်အတွင်း၌လည်း အခေါက်ရွှေတစ်ကျပ်သားလျှင် ၈၇ သိန်း အထိ ဈေးများမြင့်တက် နေခြင်းဖြစ်သည်။

“အခုရွှေဈေးတက်တာက ဈေးကစားလို့တက်တာမဟုတ်ဘူး ကမ္ဘာ့ဈေးတက်လို့တက်နေတာ။ဒါကိုရွှေ ဆိုင်ပိုင်ရှင်တွေကို ဖမ်းမယ်စစ်ဆေးမယ်သတင်းထွက်နေတော့ အရောင်း/အဝယ်မလုပ်ရဲကြတော့ဘူး ၊အရင်တုန်းကဖမ်းထားတဲ့သူတွေလဲ ခြေချုပ်နဲ့နှစ်ပါတ်တစ်ခါလက်မှတ်ထိုးနေရတယ်။ဈေးကွက်ထဲမှာလဲ အရောင်းအဝယ်အေးနေပါတယ်”ဟု ရန်ကုန်မြို့ခံရွှေဆိုင်ပိုင်ရှင်တစ်ဦးကပြောသည်။ အခေါက်ရွှေဈေးကိုရန်ကုန်တိုင်းရွှေလုပ်ငန်းရှင်များအသင်း မှ တစ်ကျပ်သားလျှင် ငါးဆယ်ကိုးသိန်းကိုးသောင်း ဖြင့်သာရည်ညွန်းဈေးသတ်မှတ်ထားကြောင်းသိရသည်။ 

ပြင်ပရွှေဈေးကွက်အတွင်းတွင်မူ နိုင်ငံတကာဈေးကွက်ပေါက်ဈေးအလိုက် ပြောင်းလဲသတ်မှတ်နေခြင်း ဖြစ်ပြီး လက်တလော အမေရိကန်ဒေါ်လာဈေးကျဆင်းနေခြင်းကြောင့်သာ ၈၇ သိန်း ဝန်းကျင် ပေါက်ဈေး ရှိနေခြင်းဖြစ်သည်။ 

လက်ရှိအမေရိကန်ဒေါ်လာဈေးမှာ တစ်ဒေါ်လာလျှင် မြန်မာငွေ ၄၀၀၀ ဝန်းကျင်ခန့်သာရှိပြီး အကယ်၍ တစ်ဒေါ်လာလျှင် ငါးထောင်ကျပ်မှခြောက်ထောင်ကျပ်အထိမြင့်တက်လာပါက ရွှေတစ်ကျပ်သားလျှင်သိန်း တစ်ရာကျော်အထိပေါက်ဈေးရှိနိုင်ကြောင်း ရွှေလုပ်ငန်းကျွမ်းကျင်သူများကခန့်မှန်းထားသည်။