Pika (NSS) - သြဂုတ် ၂ 

အမေရိကန်ရေတပ်ရဲ့ F-35 တိုက်လေယာဉ်တစ်စင်းဟာ ကယ်လီဖိုးနီးယားပြည်နယ်အလယ်ပိုင်းမှာ ပျက်ကျသွားခဲ့ တယ်လို့ သိရပါတယ်။ ဒါပေမယ့်လည်း F-35 တိုက်လေယာဉ်ရဲ့လေယာဉ်မှူးဟာ ထိုင်ခုံနဲ့အတူ အောင်မြင်စွာ ကန်ထွက်နိုင်ခဲ့ပြီး ပျက်ကျရာနေရာအနီးက ကွင်းပြင်တစ်ခုထဲမှာ လေထီးတစ်ခုနဲ့အတူ တွေ့ရှိခဲ့တယ်လို့ ဖရက်စနိုကောင်တီရဲအရာရှိရုံးက ပြောကြားခဲ့ပါတယ်။ 

F-35 တိုက်လေယာဉ်ဟာ ဖရက်စနိုမြို့အနောက်တောင်ဘက် (၆၄)ကီလိုမီတာအကွာမှာရှိတဲ့ ရေတပ်ဆိုင်ရာ လေတပ်အခြေစိုက်စခန်း Lemoore အနီးမှာ ပျက်ကျသွားခဲ့တာဖြစ်တယ်လို့လည်း သိရပါတယ်။ 

ဆိုရှယ်မီဒီယာပေါ်မှာ ပျံ့နှံ့နေတဲ့ဗီဒီယိုဖိုင်တွေမှာ F-35 တိုက်လေယာဉ်ပျက်ကျရာနေရာကနေ မီးတောက်တွေနဲ့ မီးခိုးတွေ ထွက်ပေါ်နေပြီး အရေးပေါ်ဝန်ဆောင်မှုအဖွဲ့တွေက အခင်းဖြစ်ပွားရာနေရာကို ရောက်ရှိနေတာကိုလည်း တွေ့မြင်ခဲ့ရပါတယ်။ အဲဒီ F-35 တိုက်လေယာဉ်ကို လေယာဉ်မှူးတွေကို ပြင်ဆင်ပေးတဲ့ လေ့ကျင့်ရေးယူနစ် တစ်ခုအဖြစ် ဆောင်ရွက်တဲ့ ‘Rough Raiders’ က ပိုင်ဆိုင်တာဖြစ်တယ်လို့လည်း သိရပါတယ်။

ဒါပေမယ့်လည်း ပျက်ကျမှုဖြစ်ပွားရတဲ့အကြောင်းအရင်းတွေကိုတော့ လက်ရှိအချိန်အထိ ရှင်းရှင်းလင်းလင်း မသိရှိရသေးဘူးလို့လည်း သိရပါတယ်။