Pearl (NSS) - မေ ၁၈

ပြည်ထောင်စုအဆင့် ရွေးကောက်ပွဲဝင်ရန် ကျားဖြူပါတီအနေဖြင့် အဆင်သင့်ဖြစ်နေပြီဖြစ်ကြောင်း ပါတီဥက္ကဋ္ဌ ဦးစိုင်းအိုက်ပေါင်းက ယနေ့ (မေလ ၁၈ရက်) တွင် ရန်ကုန်တိုင်းဒေသကြီး၊ သာကေတမြို့နယ်၌ကျင်းပသော   ဗဟိုဌာနချုပ်ရုံးဖွင့်ပွဲတွင် ပြောကြားခဲ့ခြင်းသည်။ 

ရှမ်းနှင့် တိုင်းရင်းသားများဒီမိုကရက်တစ်ပါတီ (ကျားဖြူပါတီ)အနေဖြင့်  လက်ရှိတွင်  ရုံးခန်းပေါင်း (၁၂၀)ကျော်ဖွင့်လှစ်ထားပြီး ဖြစ်ပြီး ပါတီဝင်စုစုပေါင်း (၄)သိန်းကျော်ရှိပြီဖြစ်ကြောင်း သိရသည်။ 

“ ပါတီဝင်တွေကလည်း ၄သိန်းကျော်သွားပြီ ။ ပထမဆုံးက သတ်မှတ်ထားတဲ့ မြို့နယ် ၁၁၀ ပြည့်မီအောင် ကြိုးစားတယ်လေ။ ပြည့်မှီတာက ပြီးခဲ့တဲ့ တစ်လ ကျော်လောက်က ပြည့်မီ တယ်။ အခုလည်း ထပ်ပြီးဖွင့်နေတယ်။ ဧရာဝတီဆိုရင် ၂၆ မြို့နယ်လုံးဖွင့်နိုင်တယ်။ ရန်ကုန်မှာ ၃၀ ကျော်ပြီ။ ဒီလကုန်ဆိုရင် ၃၅ မြို့နယ်လောက်ဖွင့်နိုင်မယ်။ ပဲခူးတိုင်းက ရှိတာက ၂၈ မြို့နယ်ပဲ။ ၂၇ မြို့နယ် ဖွင့်ပြီးပြီ။ ကျန် တစ်မြို့နယ်က တောင်ငူ၊ ထန်းတစ်ပင်တဲ့ သူတို့က မတင်ပေးဘူးတဲ့။ အဲဒါ ကြောင့်မလို့ကြန့်ကြာတာပေါ့နော်။ နေပြည်တော်ကတော့ ဘယ်သိမလဲ နောက်ကျတာကိုး။  သူတို့ ကော်မရှင် လိုင်းကတော့ နည်းနည်းလိုနေတယ်လေ။” ဟု ဦးစိုင်းအိုက်ပေါင်း ပြောသည်။ 

ရွေးကောက်ပွဲ ကော်မရှင်၏ သတ်မှတ်ချက်များအတိုင်း ပြီးခဲ့သည့် တစ်လခန့်က ပြည့်မှီခဲ့သော်လည်း  ကော်မရှင်၏ အဆင့်ဆင့် စိစစ်မှုများကြောင့် ပြည်ထောင်စုအဆင့် ဝင်ရောက်ယှဉ်ပြိုင်မည့် ပါတီများအနက် သတ်မှတ်ရုံးခန်းအရေအတွက် ပြည့်မီ သည့် ပါတီများကို ထုတ်ပြန်ကြေငြာရာတွင် ကျားဖြူပါတီ မပါဝင်ခဲ့ခြင်းဖြစ်ကြောင်း သိရသည်။ 

“မြို့နယ်တွေကလည်း (၁၂၀)ကျော်ပြီ ဖွင့်ထားပြီးသား။ တကယ်တမ်းကျတော့ ကော်မရှင်က မရောက်သေးတော့လေ ကျွန်တော်တို့ ပြည့်စုံတဲ့ပါတီ မပါဘူး ဖြစ်နေတယ်။ တစ်နိုင်ငံလုံးပါတီက ၃ပါတီပဲရှိတယ်တဲ့။ ကျွန်တော်တို့ ကျားဖြူက မပါဘူးလားဆိုတော့ ကျွန်တော်တို့ တင်ထားတာ လွန်ခဲ့တဲ့ တစ်လ ကျော်လောက်က  ပါတီက ရုံးခန်းတွေ ၁၀၅ကျော်ဖွင့်ပြီးပြီ။ ဘာဖြစ်လို့လဲဆို‌တော့ သူတို့ ကမြို့နယ်ကော်မရှင်၊ ခရိုင်ကော်မရှင် ပြီးတော့ မှ တိုင်းကော်မရှင်မှ နေပြည်တော်ဆိုပြီးတော့ အဆင့်ဆင့်ပေါ့။  ကြားထဲမှာ  ကြာနေလို့ဖြစ်မှာပါတဲ့၊ ကော်မရှင်ဘက်ကပဲ အဆင့်ဆင့် လုပ်ရတဲ့ အတွက်ကြောင့်မို့  နှောက်နှေးတာဖြစ်မှာပါ။ ပြည့်သွားမှာပါ” ဟု ဦးစိုင်းအိုက်ပေါင်း ကဆက်လက်ပြောသည်။ 

လာမည့်ရွေးကောက်ပွဲတွင် ပြည်ထောင်စုအဆင့် ဝင်ရောက်ယှဉ်ပြိုင်မည့်ပါတီများအနက်  ပြည်ထောင်စု ကြံ့ခိုင်‌ရေး နှင့် ဖွံ့ဖြိုးရေးပါတီ (USDP) ၊ တိုင်းရင်းသားစည်းလုံးညီညွတ်ရေးပါတီ (တစည)နှင့် ပြည်သူ့ရှေ့ဆောင်ပါတီ (PPP)  ပါတီသာ သတ်မှတ်ရုံးခန်း ပြည့်မှီသေးကြောင်း  ရွေးကောက်ပွဲ ကော်မရှင်က ထုတ်ပြန်ထားသည်။