Pika (NSS) - ဧပြီ ၂၃

ဗြိတိန်အစိုးရဟာ အမေရိကန်အပေါ် မှီခိုအားထားမှုကို လျှော့ချဖို့အတွက် ဖောက်ခွဲရေးပစ္စည်းတွေထုတ်လုပ်မှုကို သိသိသာသာတိုးမြှင့်သွားလိမ့်မယ်လို့ The Times သတင်းစာက ရေးသားဖော်ပြခဲ့ပါတယ်။

အမေရိကန် စစ်ဘက်ဆိုင်ရာ အထောက်အပံ့တွေရဲ့ ယုံကြည်စိတ်ချရမှုအပေါ် စိုးရိမ်မှုတွေ ကြီးထွားလာနေတာကို ကိုးကားပြီး The Times သတင်းစာက ယခုလိုရေးသားဖော်ပြခဲ့တာဖြစ်တယ်လို့လည်း သိရပါတယ်။ အစီရင်ခံစာအရ (၁၅၅)မီလီမီတာအမြောက်ကျည်တွေနဲ့ အခြားဗြိတိန်စစ်လက်နက်ပစ္စည်းတွေမှာ အသုံးပြုတဲ့ အဓိကဖောက်ခွဲရေးပစ္စည်းဖြစ်တဲ့ RDX ကို နိုင်ငံတစ်ဝန်းက နေရာအများအပြားမှာ ထုတ်လုပ်သွားမှာဖြစ်တယ်လို့လည်း သိရပါတယ်။ ဒါ့ပြင် BAE Systems ကုမ္ပဏီကလည်း ဖောက်ခွဲရေးပစ္စည်းတွေထုတ်လုပ်မှုကို တိုးမြှင့်ဖို့အတွက် နေရာအသစ်(၃)ခုကို တည်ဆောက်ဖို့ စီစဉ်နေတယ်လို့ ကုမ္ပဏီ စီးပွားရေးဖွံ့ဖြိုးတိုးတက်မှုဒါရိုက်တာ စတိဗ်ကာဒရုးကပြောကြားခဲ့ပါတယ်။

စတိဗ်ကာဒရူးက "ကြီးမားတဲ့အဆောက်အအုံတစ်ခုက လုံခြုံရေး ခြိမ်းခြောက်မှုကြီးတစ်ခုဆိုတာ သိသာထင်ရှားပါတယ်။ သေးငယ်ပြီး နေရာအနှံ့အပြားမှာ ဖြန့်ကျက်ချထားတဲ့ အဆောက်အအုံတွေက ပိုပြီးလုံခြုံလိမ့်မယ်ဆိုတာ ကျွန်တော်တို့အားလုံးနားလည်ပါတယ်”လို့ ပြောဆိုခဲ့ပါတယ်။ ဒါ့ပြင် ရုရှားအပြင်အခြားရန်လိုနေတဲ့နိုင်ငံတွေနဲ့ ယှဉ်ပြိုင်နိုင်ဖို့က အရေးကြီးတယ်လို့ စတိဗ်ကာဒရူးကပြောကြားခဲ့ပြီး ကမ္ဘာလုံးဆိုင်ရာဝယ်လိုအားမြင့်တက်လာမှုတွေက ဖောက်ခွဲရေးပစ္စည်းတွေထုတ်လုပ်မှုကို တိုးမြှင့်ဖို့အတွက် BAE Systems ကုမ္ပဏီကို တွန်းအားပေးခဲ့တယ်လို့လည်း ပြောကြားခဲ့ပါတယ်။