Pika (NSS) - ဧပြီ ၂၃

အိန္ဒိယဝန်ကြီးချုပ်မိုဒီဟာ နှစ်နိုင်ငံကြားဆက်ဆံရေးတွေကို မြှင့်တင်ဖို့အတွက် ဧပြီလ(၂၂)ရက်မှာ ဆော်ဒီအာရေးဗျနိုင်ငံ Jeddah မြို့ကို အလည်အပတ်ရောက်ရှိလာခဲ့တယ်လို့ သိရပါတယ်။

မိုဒီဟာ အိန္ဒိယနိုင်ငံမှာ အမေရိကန်ဒုသမ္မတ JD Vance နဲ့ အဆင့်မြင့်ဆွေးနွေးပွဲကို လုပ်ဆောင်ခဲ့ပြီးနောက် တစ်ရက်အကြာမှာ ဆော်ဒီအာရေးဗျနိုင်ငံကို သွားရောက်လည်ပတ်ခဲ့တာဖြစ်တယ်လို့လည်း သိရပါတယ်။ အမေရိကန်ရဲ့ အခွန်စည်းကြပ်မှုတွေကို ရှောင်ရှားနိုင်ဖို့နဲ့ ကုန်သွယ်ရေးသဘောတူညီချက်တစ်ခုကို ရယူနိုင်ဖို့အတွက် အိန္ဒိယအစိုးရက ကြိုးပမ်းနေချိန်မှာပဲ မိုဒီနဲ့ JD Vance တို့ရဲ့ တွေ့ဆုံမှုထွက်ပေါ်လာတာဖြစ်ပါတယ်။

မိုဒီက"ပြီးခဲ့တဲ့နှစ်တွေအတွင်း မဟာဗျူဟာမြောက်နည်းလမ်းတွေနဲ့အတူရရှိခဲ့တဲ့ ဆော်ဒီအာရေးဗျနိုင်ငံနဲ့ ရှည်လျားတဲ့သမိုင်းဝင်ဆက်ဆံရေးကို အိန္ဒိယက လေးလေးနက်နက်တန်ဖိုးထားပါတယ်။ ကျွန်တော်တို့နှစ်နိုင်ငံစလုံးဟာ နှစ်ဦးနှစ်ဖက်အကျိုးရှိတဲ့ ခိုင်မာတဲ့မိတ်ဖက်ဆက်ဆံရေးတွေကို ဖော်ဆောင်နိုင်ခဲ့ပါတယ်။”လို့ပြောဆိုခဲ့ပါတယ်။ ဆော်ဒီအာရေးဗျနိုင်ငံဟာ ကမ္ဘာပေါ်မှာလူဦးရေအများဆုံးနိုင်ငံတစ်နိုင်ငံဖြစ်တဲ့ အိန္ဒိယနိုင်ငံကို ရေနံအဓိကတင်ပို့သူအဖြစ် နှစ်ပေါင်းများစွာကြာအောင် ရပ်တည်ခဲ့တာဖြစ်တယ်လို့လည်း သိရပါတယ်။ အိန္ဒိယနိုင်ငံရဲ့လျင်လျင်မြန်မြန်ဖွံ့ဖြိုးတိုးတက်နေတဲ့ စီးပွားရေးဟာ ရေနံတင်သွင်းမှုအပေါ် ကြီးကြီးမားမား မှီခိုနေရပြီး ဆော်ဒီအာရေးဗျနိုင်ငံဟာ အိန္ဒိယနိုင်ငံရဲ့တတိယမြောက်အကြီးဆုံးရေနံတင်သွင်းတဲ့နိုင်ငံဖြစ်တယ်လို့ အိန္ဒိယနိုင်ငံခြားရေးဝန်ကြီးဌာနက ပြောကြားခဲ့ပါတယ်။