ရောင်နီ (NSS) - ဧပြီ ၂၃

          ပါကစ္စတန်နိုင်ငံမှာ နိုင်ငံတစ်ဝန်း လေထုညစ်ညမ်းမှုကြောင့် ကျန်းမာရေးအရေးပေါ်အခြေအနေ စိုးရိမ်မှုများဖြစ်ပေါ်နေပြီး ကိုင်တွယ်ဖြေရှင်းဖို့ ကြိုးပမ်းဆောင်ရွက်မှုတွေ ပြုလုပ်နေရပါတယ်။

         ပါကစ္စတန်ရဲ့ လူဦးရေအများဆုံးပြည်နယ် ပန်ဂျပ်မှာ အသက်ငါးနှစ်အောက်ကလေး (၁၁)သန်းကျော်ဟာ လေထုညစ်ညမ်းမှုကြောင့် အဆိပ်သင့်နေတဲ့လေကို နေ့စဉ်နဲ့အမျှ ထိတွေ့နေရတယ်လို့ ကုလ သမဂ္ဂက ဆိုပါတယ်။ ဆွစ်ဇာလန်လေထုအရည်အသွေးခြေရာခံ IQAir ရဲ့ဖော်ပြချက်အရ ပါကစ္စတန်နိုင်ငံ မြို့တော်မှာ မကြာခဏဆိုသလို ကမ္ဘာ့လေထုအရည်အသွေး အညွှန်းကိန်း (၁၀၀)ထက်ကျော်လွန်နေလေ့ရှိပြီး ကျန်းမာရေးကို ထိခိုက်စေတဲ့ PM2.5 ပမာဏဟာ ကမ္ဘာ့ကျန်းမာရေးအဖွဲ့ရဲ့ ၂၄ နာရီလေထုအရည်အသွေး လမ်းညွှန်ချက်တွေထက် (၁၅)မိုက်ခရိုဂရမ် ကျော်လွန်နေပါတယ်။ ဒီလေထုညစ်ညမ်းမှုဟာ ကလေးတွေရဲ့ ကျန်းမာရေးအတွက် အကြီးမားဆုံးခြိမ်းခြောက်မှုတစ်ခုလို့ ကမ္ဘာ့ကျန်းမာရေးအဖွဲ့က ဆိုပါတယ်။

      လေထုညစ်ညမ်းမှုဟာ ကျောင်းသားတွေရဲ့ ရုပ်ပိုင်းဆိုင်ရာ ကျန်းမာရေးကို ထိခိုက်စေရုံသာမက စိတ်ကျန်းမာရေးကိုပါ ထိခိုက်စေတာကိုလည်း တွေ့ရှိရပါတယ်။ Trinity School Lahore မှ ကျောင်းအုပ် တိုင်မာဘန်ဒေရဲ့ဖော်ပြချက်အရ ကျောင်းသားတွေဟာ စိုးရိမ်ပူပန်မှု၊ စိတ်ဓာတ်ကျမှုတို့ကြောင့် ကျောင်းရဲ့ကျန်းမာရေးအတိုင်ပင်ခံပုဂ္ဂိုလ်တွေနဲ့ပါ ဆွေးနွေးအကြံပြုချက် ရယူနေရတယ်လို့ သိရပါတယ်။