Pearl (NSS)- မတ် ၁၉  

     ရွေးကောက်ပွဲ အထမြောက်အောင်မြင်ရန် အတွက် လက်နက်ကိုင်အဖွဲ့အစည်းများပါဝင်သော ငြိမ်းချမ်းရေးဆွေးနွေးပွဲကို ကျင်းပသင့်ကြောင်း ရခိုင့် ဦးဆောင်ပါတီ ဥက္ကဋ္ဌ ဒေါက်တာအေးမောင်က NSS မှတစ်ဆင့်အကြုံပြု ပြောကြားသည်။

    နစကမှ ကျင်းပပေးမည့်ရွေးကောက်ပွဲတွင် လွှတ်တော်ကိုယ်စားလှယ်လောင်းများ အပါအဝင် လာရောက် မဲထည့်မည့်ပြည်သူများအားလုံးကို လုံခြုံ မှုရှိစေလိုပြီး အောင်မြင်ပြီးမြောက်သည့်ရွေးကောက် ပွဲတစ်ခုဖြစ်စေလိုကြောင်း ဒေါက်တာအေးမောင်က ဆိုသည်။ တာဝန်ရှိသူများအနေဖြင့်လည်း ရွေးကောက်ပွဲကျင်းပနိုင်ရေးအတွက် ကြိုတင်ပြင်ဆင်မှုများဆောင်ရွက်ရာတွင် တည်ငြိမ်အေးချမ်းရေးနှင့် တရားဥပဒေစိုးမိုးရေးလုပ်ငန်းများကို ဆောင်ရွက် လျက်ရှိသော်လည်း ရွေးကောက်ပွဲ အောင်မြင်အထမြောက်စေရန် ကူညီပံ့ပိုးရမည့် အခြားအကြောင်း အရင်းများကိုလည်း ရှာဖွေသင့်ကြောင်း  ၎င်းက ပြောသည်။

    " ရွေးကောက်ပွဲ အောင်မြင်အထမြောက်စေဖို့ အတွက် ကူညီပံ့ပိုးရမယ့်အကြောင်းအရင်းတွေ ရှာရ မှာ‌ပေါ့။  အကြောင်းရင်းတွေထဲမှာ ရွေးကောက်ပွဲကို ကာကွယ်စောက်ရှောက်တဲ့ ဥပဒေတွေလည်းရှိ ကောင်းရှိနိုင်တာပေါ့။ ရွေးကောက်ပွဲနဲ့ပတ်သက်လို့ လုံခြုံရေးအဖွဲ့အစည်းတွေကလည်း လိုအပ်တဲ့လုံခြုံမှု ကို ပေးတာမျိုးလည်းရှိရင်ရှိမှာပေါ့။ အန္တရာယ်ကင်း ကင်းနဲ့ ရွေးကောက်ပွဲကျင်းပနိုင်အောင် ခုနကပြောတဲ့ အစီအမံလေးတွေအပြင် အားလုံးပါဝင်နိုင်တဲ့ ဆွေး နွေးပွဲတစ်ခုဆိုရင် ပိုကောင်းမလားပေါ့။ အဲဒါကြောင့် လည်း ရွေးကောက်ပွဲမတိုင်ခင်မှာ လက်နက်ကိုင်နေ ကြတဲ့ပဋိပက္ခမှာပါတဲ့ ပုဂ္ဂိုလ်အားလုံးပါဝင်နိုင်တဲ့ ဆွေးနွေးပွဲတစ်ခု၊ ငြိမ်းချမ်းရေးအတွက် ဆွေးနွေးပွဲ တစ်ခု လုပ်ရင်ပိုကောင်းမယ်ပေါ့။ ဒါမှလည်း ရွေး ကောက်ပွဲကို အောင်မြင်စွာကျင်းပနိုင်အောင် အထောက်အကူ အများကြီးပေးနိုင်မယ်ဆိုတဲ့ သဘောပေါ့။ တစ်နည်းအားဖြင့် ရွေးကောက်ပွဲ မလုပ် ခင်လေးမှာ လက်နက်ကိုင်ပဋိပက္ခမှာပါတဲ့ ပုဂ္ဂိုလ်တွေ လာရောက်တွေ့ဆုံ ဆွေးနွေးမယ်။ လက်နက်ကိုင်ရတဲ့ အကြောင်းအရင်းတွေကို ဖြေရှင်းမယ်။ လမ်းစရှာမယ် ပေါ့။ အဲဒီလိုနဲ့ရွေးကောက်ပွဲကြီးကို ဖြတ်သန်းမယ်" ဟု ဒေါက်တာအေးမောင်က ပြောသည်။

    ရွေးကောက်ပွဲမတိုင်မီကာလ၌ ငြိမ်းချမ်း ရေးဆွေးနွေးပွဲဆောင်ရွက်ခြင်းဖြင့် ရွေးကောက်ပွဲ၏ လုံခြုံမှု၊ အားလုံးပါဝင်နိုင်မှုကို တစ်ဖက်တစ်လမ်းမှ အထောက်အကူပေးနိုင်မည်ဖြစ်ကြောင်း သိရသည်။"ရွေး ကောက်ပွဲကြီးအလွန်မှာ အေးချမ်း သွားအောင်၊ ငြိမ်းချမ်းသွားအောင် ဆောင်ရွက်တဲ့ လုပ်ငန်းမပြီးမြောက်သေးရင်လည်း ရွေးကောက်ပွဲအ လွန်မှာထပ်ပြီးတော့ ဆွေးနွေးညှိနှိုင်းနိုင်အောင်၊ တစ် နည်းအားဖြင့် ငြိမ်းချမ်းရေးလုပ်ရမယ့် Process ကတော့ ရွေးကောက်ပွဲမတိုင်ခင် အဲဒီလိုလုပ်ခြင်းအား ဖြင့် ရွေးကောက်ပွဲရဲ့လုံခြုံမှု၊ အားလုံးပါဝင်နိုင်မှုကို အထောက်အကူပေးနိုင်မယ်ဆိုတဲ့ သဘောပါ။ မပြီး မြောက်သေးရင်တောင်မှ ရွေးကောက်ပွဲကာလအလွန်လာမယ့်အစိုးရက ဆက်လက်ဆောင်ရွက်သင့် တယ်" ဟု ၎င်းက ဆက်လက်ပြောသည်။

    နိုင်ငံတော်စီမံအုပ်ချုပ်ရေးကောင်စီအနေဖြင့်တိုင်းရင်းသားလက်နက်ကိုင်အဖွဲ့များနှင့် တွေ့ဆုံ ဆွေးနွေးမှုများပြုလုပ်ခဲ့ပြီး ဆက်လက်၍လည်း လွတ်လပ်စွာဆွေးနွေးပြောဆိုကြရန် ကမ်းလှမ်းထားကာ ထာဝရငြိမ်းချမ်းရေးအတွက် အစဉ်အမြဲ တံခါးဖွင့်ကြိုဆိုလျက်ရှိကြောင်းသိရသည်။