Pika (NSS) - မတ် ၁၄

    တောင်ကိုရီးယားတိုက်လေယာဉ်နှစ်စင်းသည် အမေရိကန်နှင့် ပူးတွဲစစ်ရေးလေ့ကျင့်မှုများ လုပ်ဆောင်စဉ်အချိန်အတွင်း မြောက်ကိုရီးယားနှင့် ထိစပ်နေသော နယ်စပ်အနီးရှိ ရွာတစ်ရွာကို မတော် တဆဗုံးကြဲချမိခဲ့ပြီးနောက် တောင်ကိုရီးယားစစ်ဘက် ဆိုင်ရာ စုံစမ်းစစ်ဆေးရေးမှူးများက လေတပ်မှ လေယာဉ်မှူးနှစ်ဦးကို ရာဇဝတ်မှုဆိုင်ရာ ပေါ့ဆမှုဖြင့် တရားစွဲဆိုခဲ့ကြောင်း သိရသည်။

    အဆိုပါဗုံးမတော်တဆကြဲချမိမှုအတွင်း အရပ်သား အနည်းဆုံး(၂၉)ဦးထိခိုက်ဒဏ်ရာရရှိခဲ့ပြီး အရပ်ဘက်ပိုင်ဆိုင်မှုများ ပျက်စီးသွားခဲ့ကြောင်း ထုတ်ပြန်ချက်များအရ သိရသည်။ ပြီးခဲ့သည့်မတ်လ (၆)ရက်တွင် တောင်ကိုရီးယား၏ KF-16 တိုက်လေ ယာဉ်နှစ်စင်းသည် မြောက်ကိုရီးယားနယ်စပ်အနီးရှိ ရွာတစ်ရွာကို MK-82 ဗုံး(၈)လုံး မှားယွင်းကြဲချမိခဲ့ခြင်းဖြစ်ကြောင်းသိရသည်။

    တောင်ကိုရီးယား ကာကွယ် ရေးဝန်ကြီးဌာနက "တောင်ကိုရီးယား လေတပ်ရဲ့ လေယာဉ်မှူးနှစ်ဦးရဲ့ ပစ် မှတ်ကိုဩဒိနိတ်မှားယွင်းမှုဟာ အဲဒီဖြစ်ရပ်ကို ဖြစ်ပွားစေခဲ့တဲ့ တိုက်ရိုက်အကြောင်း အရင်းတစ်ခုဖြစ်တယ်ဆိုတာကို ရာဇဝတ်မှုဆိုင်ရာစုံစမ်းစစ်ဆေးရေးကွပ်ကဲမှုဌာနချုပ်က အတည်ပြုခဲ့ပါတယ်"ဟု ထုတ်ပြန်ပြောဆိုခဲ့သည်။

    ထို့ပြင် စွဲချက်တင်ခံထားရ သော လေယာဉ်မှူးများကို လေကြောင်းပျံသန်းမှုများမှ ရပ်ဆိုင်းထားပြီး ၎င်းတို့၏ပျံသန်းမှုအသိအမှတ်ပြုလက်မှတ်များကို ပြန်လည်စစ်ဆေးမှု များလုပ်ဆောင်လျက်ရှိကြောင်းလည်း သိရသည်။ အဆိုပါဗုံးမတော်တဆကြဲချမိမှုကြောင့် ဘုရားကျောင်းတစ်ခုနှင့် အခြားအဆောက်အအုံ အနည်း ဆုံး(၇)လုံးခန့်ပျက်စီးခဲ့ကြောင်းလည်း သိရသည်။

    MK-82 ဗုံးသည် အမေရိကန်ထုတ် ခဲယမ်းမီးကျည်တစ်ခုဖြစ်ပြီး KF-16 တိုက်လေယာဉ်သည် (၁၉၉၀)ခုနှစ်မှ (၂၀ဝဝ)ခုနှစ်များအတွင်း တောင်ကိုရီးယားနိုင်ငံတွင် ထုတ်လုပ်ခဲ့သည့် အမေရိကန် F-16 တိုက်လေယာဉ်၏ ကိုရီးယားဗားရှင်းဖြစ်ကြောင်း သိရသည်။