သန့်ဇင် (NSS) - စက်တင်ဘာ ၁၂

မန္တလေးတိုင်းဒေသကြီး၊ ရမည်းသင်းမြို့နယ်တွင် ရေကြီးရေလျှံမှုကြောင့် သေဆုံးသူ(၁၀)ဦးထိရှိပြီး လူဦးရေ(၅၀၀၀၀)ကျော် ရေဘေးသင့်ခဲ့ကြောင်း မြန်မာနိုင်ငံမီးသတ်တပ်ဖွဲ့၏ ယနေ့(စက်တင်ဘာလ ၁၁ ရက်) နံနက်အစောပိုင်းက ထုတ်ပြန်ချက်အရ သိရသည်။

မိုးသည်းထန်စွာရွာသွန်းခြင်းကြောင့် ရေကြီးရေလျှံမှုဖြစ်ကာ ရမည်းသင်းမြို့နယ်အတွင်း ရပ်ကွက်၊ ကျေးရွာအုပ်စုများမှ အိမ်ထောင်စု (၁၅၁၁၃)စုမှ ကျား(၂၃၉၉၅)ဦးနှင့် မ(၂၉၉၇၇)ဦး၊ စုစုပေါင်း (၅၃၉၇၂)ဦး ရေဘေးသင့်ခဲ့ကြောင်း သိရသည်။

ထို့ပြင် ရမည်းသင်းမြို့နယ်ရှိ ဆည်ကြီးကျေးရွာအုပ်စု၊ ဆည်ကြီးကျေးရွာမှ ကျား(၁)ဦး၊ ညောင်အိုင်ကျေးရွာမှ မ(၁)ဦး၊ မြင်းနားကျေးရွာ အုပ်စု၊ ကံသာအေးကျေးရွာမှ ကျား(၂)ဦး၊ မ(၄)ဦး၊ ရွှေနန်းပေါ်ကျေးရွာမှ မ(၁)ဦးနှင့် ဝါးဖြူတောင်ကျေးရွာအုပ်စု၊ ချောင်းဖျားကျေးရွာမှ မ(၁)ဦး၊ စုစုပေါင်း (၁၀)ဦးထိ ရေကြီးရေလျှံမှုအတွင်း သေဆုံးခဲ့ကြောင်း သိရသည်။

ထို့နောက် ရေဘေးသင့်ပြည်သူများကို ရမည်းသင်းမြို့နယ်မီးသတ်စခန်းမှ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များမှ သက်ဆိုင်ရာအဖွဲ့အစည်းများနှင့် ပူးပေါင်းကာ သီလဝခန်းမ၊ သာသနာ့ဗိမာန်၊ ဘုန်းကြီးကျောင်း၊ ရွာတန်းခန်းမ၊ ကိုးခန်းကြီးဓမ္မာရုံ၊ ရန်ကြီးအောင်ကျောင်း စသည့်ရေဘေးရှောင်နေရာများနှင့် နီးစပ်ရာဆွေမျိုးထံသို့ ကူညီရွှေ့ပြောင်းပေးခဲ့ကြောင်း သိရသည်၊၊

နေပြည်တော်ကောင်စီနယ်မြေအတွင်းရှိ တပ်ကုန်းမြို့နယ်နှင့် ပျဉ်းမနားမြို့နယ်တို့တွင်လည်း ရေကြီးရေလျှံမှုကြောင့် သေဆုံးသူ(၅)ဦး ထိရှိခဲ့ကြောင်း ရေဘေးကယ်ဆယ်ရေးများလုပ်ဆောင်နေသော ဒေသခံပရဟိတအသင်းများထံမှ သိရသည်။

လက်ရှိတွင် နိုင်ငံတစ်ဝန်းလုံး မြို့ပေါင်း(၁၀)မြို့ထက်မနည်း ရေကြီးရေလျှံမှုဖြစ်ပေါ်နေပြီး အိမ်ထောင်စုပေါင်းများစွာကို ရေဘေးကယ် ဆယ်ရေးစခန်းများသို့ ပြောင်းရွေ့ကယ်ဆယ်ထားရကြောင်း NSS သတင်းဌာနက စုစည်းထားသည့် အသင်းအချက်အလက်များအရ သိရသည်။