မြူနစ် (NSS) - စက်တင်ဘာ ၁၂

တိုင်းရင်းသားလက်နက်ကိုင်အဖွဲ့တချို့အနေဖြင့် စစ်ရေးအရ နယ်မြေတချို့ကို လွှမ်းမိုးထိန်းချုပ်နိုင်သော်လည်း နိုင်ငံရေးအာဏာ အမှန်တကယ်ရရှိခြင်း ရှိ၊ မရှိကို ဗိုလ်မှူးကြီးခွန်ဥက္ကာက မေးခွန်းထုတ်ထားသည်။

လက်ရှိတွင် နိုင်ငံအတွင်းရှိ တိုင်းရင်းသားလက်နက်ကိုင်အဖွဲ့များဖြစ်သော MNDAA၊ TNLA၊ AA နှင့် KIA အဖွဲ့တို့သည် တိုက်ပွဲများ ဖော်ဆောင်ကာ နယ်မြေတချို့ကို ထိန်းချုပ်နိုင်နေသည့်သဘောတွင် ရှိနေသည်။

ယင်းကဲ့သို့အခြေအနေများနှင့်ပတ်သက်၍ NSS က PNLO အဖွဲ့၏ ဦးဆောင်နာယက ဗိုလ်မှူးကြီး ခွန်ဥက္ကာကို ဆက်သွယ်မေးမြန်းကြည့်ရာ တွင် ၎င်းက လက်နက်ကိုင်အဖွဲ့များအနေဖြင့် မြေပြင်ကို ထိန်းချုပ်ထားသော်လည်း အချုပ်အခြာအာဏာပိုင်သွားပြီဟု ပြောဆို၍ မရကြောင်း ပြန်လည်တုံ့ပြန်ခဲ့သည်။

“ကျွန်တော်တို့က မြေပြင်မှာ လက်တွေ့လုပ်နေပါတယ်။ မြေပြင်ကို အဲဒီလိုထိန်းချုပ်ထားတဲ့အတွက် အချုပ်အခြာအာဏာပိုင်သွားပြီလို့ ပြောလို့မရဘူး။ အချုပ်အခြာအာဏာပိုင်တယ်ဆိုတာက နိုင်ငံရေးစကားဖြစ်တယ်။ နိုင်ငံတကာအသိအမှတ်ပြုမှု၊ နိုင်ငံတကာနဲ့ ဒေသတွင်းပေါ့ဗျာ။ ဥပမာ-အာဆီယံလိုပေါ့။ ဒီလိုဒေသတွင်းအဖွဲ့အစည်းတွေ၊ နိုင်ငံတကာအဖွဲ့အစည်းတွေ၊ ကုလသမဂ္ဂတွေ ဒီအဖွဲ့အစည်းတွေက အသိအမှတ်ပြုမှ အချုပ်အခြာ အာဏာပိုင်တဲ့ ထိန်းချုပ်မှုလို့ ပြောရမယ်။ စစ်ရေးအရ အကြောင်းကြောင်းကြောင့် နယ်မြေတချို့ကို လွှမ်းမိုးထိန်းချုပ်နိုင်ပေမယ့် နိုင်ငံရေးအာဏာ တကယ်ရ၊ မရဆိုတာ ကျွန်တော်တို့က နောက်ထပ်မေးခွန်းတစ်ခုပေါ့” ဟု ဗိုလ်မှူးကြီးခွန်ဥက္ကာက ပြောသည်။

လက်ရှိတွင် နစကအစိုးရအနေဖြင့် နယ်မြေတချို့အား လက်လွှတ်လိုက်ရသည့်အခြေအနေမျိုး ရှိကောင်းရှိနေနိုင်သော်လည်း အချုပ်အခြာအာဏာကို ၎င်းတို့ကသာ ဆက်လက်ကျင့်သုံးနေဆဲဖြစ်ကြောင်း PNLO ဦးဆောင်နာယကက ဆိုသည်။

“အဲဒီတော့ ကျွန်တော်တို့က နယ်မြေထိန်းချုပ်တာနဲ့ တရားဝင်မှုနဲ့က နည်းနည်းလေးကွာသေးတယ်ဆိုတာ ပြောပြချင်ပါတယ်။ နယ်မြေဆုံးရှုံးတာတော့ ဖြစ်ကောင်းဖြစ်မယ်။ လက်ရှိကတော့ အချုပ်အခြာအာဏာကို သုံးနေတာကတော့ လက်ရှိ SAC ပဲ ဖြစ်နေသေးတယ်။ အဲဒါကတော့ စဉ်းစားစရာဖြစ်တာပေါ့”ဟု ဗိုလ်မှူးကြီးခွန်ဥက္ကာက ပြောသည်။

မြောက်ပိုင်းမဟာမိတ်(၃)ဖွဲ့ဖြစ်သည့် MNDAA၊ TNLA နှင့် AA လက်နက်ကိုင်အဖွဲ့တို့သည် ပြီးခဲ့သော ၂၀၂၃ ခုနှစ်၊ အောက်တိုဘာ ၂၇ ရက်နေ့တွင် ၁၀၂၇ စစ်ဆင်ရေးအမည်ဖြင့် ရှမ်းပြည်နယ်မြောက်ပိုင်း၌ တိုက်ပွဲများကို နစကအစိုးရ၏ မြို့တချို့ကို ထိန်းချုပ်နိုင်ခဲ့သည်။

ထို့ပြင် ၎င်း(၃)ဖွဲ့က ၂၀၂၄ ခုနှစ်အတွင်း ထပ်မံဖော်ဆောင်သည့် ၁၀၂၇ စစ်ဆင်ရေးအပိုင်း(၂)ကာလတွင်လည်း လားရှိုးရှိ အရှေ့မြောက်တိုင်းစစ်ဌာနချုပ်ကို တိုက်ခိုက်သိမ်းပိုက်ကာ လားရှိုးမြို့ကို ထိန်းချုပ်နိုင်ခဲ့သည်။၎င်းကဲ့သို့ လက်နက်ကိုင်အဖွဲ့များ ထိန်းချုပ်ထားသည့် မြို့များကို နစက၏ တပ်မတော်ဘက်ကလည်း လေကြောင်းဖြင့် ပြန်လည်တိုက်ခိုက်မှုများရှိနေသည်။