ယွန်း (NSS) - သြဂုတ် ၁၅

စက်သုံးဆီလုပ်ငန်းရှင်များအတွက် ဗဟိုဘဏ်မှ အမေရိကန်ဒေါ်လာ သန်း ၁၀၀ ပံ့ပိုးပေးရန် စီစဥ်နေကြောင်း မြန်မာနိုင်ငံတော်ဗဟိုဘဏ်မှ သြဂုတ်လ (၁၄) ရက်တွင် အသိပေးထုတ်ပြန်ထားသည်။

မြန်မာနိုင်ငံတော်ဗဟိုဘဏ်အနေဖြင့် နိုင်ငံခြားငွေကြေးဈေးကွက်တွင် စက်သုံးဆီလုပ်ငန်းရှင်များအား အမေရိကန်ဒေါ်လာ သန်း ၁၀၀ ပံ့ပိုးပေးရန် စီ   စဥ်ထားကြောင်း သိရသည်။

ထို့ပြင် ဗဟိုဘဏ်မှ ပြီးခဲ့သည့်ရက်ပိုင်းအတွင်းကလည်း နိုင်ငံခြားငွေကြေးဈေးကွက်တွင် ‌စက်သုံးဆီ၊ စားသုံးဆီ နှင့် ဆေးဝါးကဏ္ဍများအတွက် FX Trading Platform မှတစ်ဆင့် အမေရိကန်ဒေါ်လာ ၅ သန်း နှင့် တရုတ်ယွမ် ၅ သန်း တိုကို ရောင်းချပေးခဲ့သည်။ 

ထို့ပြင် စက်သုံးဆီဖူလုံစွာသုံးစွဲနိုင်ရေးအတွက် သိုလှောင်ဖြန့်ဖြူးလျက်ရှိသည့်အပြင် ပြည်ပမှစက်သုံးဆီတင်သင်္ဘောများဝင်ရောက်ရန် ဆောင်ရွက်ထားခြင်းကြောင့် စက်သုံးဆီပြတ်လပ်မှုမရှိနိုင်ကြောင်း ဩဂုတ်လ ၁ ရက်တွင် စွမ်းအင်ဝန်ကြီးဌာနက ထုတ်ပြန်ပြောကြားခဲ့ဖူးသည်။

“လောလောဆယ်မှာတော့ ပြည်သူတွေကို စက်သုံးဆီအလုံအလောက်ရှိပါတယ်၊ စက်သုံးဆီမပြတ်ပါဘူးဆိုတာမျိုးကို အသိပေးလိုက်တဲ့သဘောပေါ့။ စက်သုံးဆီဝယ်ဖို့ လုံလုံလောက်လောက် ပိုက်ဆံရှိတယ်၊ ပေးမယ်၊ ပူစရာမလိုဘူးဆိုတာမျိုးကို ပြောလိုက်တာပေါ့။ အခုက လူတွေက စိုးရိမ်စိတ်တွေနဲ့ တစ်နေ့ထက်တစ်နေ့ တန်းစီဝယ်တဲ့သူက များများလာတယ်။ ဒီနေ့ဆိုပိုများမယ်။ ရှေ့ကဝယ်တဲ့သူကလည်း နှစ်ရက်သုံးရက်သုံးလိုက်ရင် ကုန်သွားတော့ ပြန်တန်းစီကြတယ်။ ဒီလိုမျိုးနဲ့ တန်းစီတဲ့ပမာဏက များလာတာပေါ့” ဟု ပြည်တွင်းရှိ စီးပွားရေးလုပ်ငန်းရှင်တစ်ဦးက NSS ကိုသုံးသပ်ပြောဆို ထားသည်။

လက်ရှိတွင် ရန်ကုန်မြို့အပါအဝင် နိုင်ငံတစ်ဝန်းရှိအခြားမြို့များ၌ စက်သုံးဆီဆိုင်များတွင် အကန့်အသတ်ဖြင့်ရောင်းချနေရသည့်အတွက် ဒေသခံများမှာ အချိန်ကြာမြင့်စွာ တန်းစီဝယ်နေရသည့်အတွက် အခက်အခဲများစွာဖြစ်ပေါ်နေသည့်အပြင် ဈေးနှုန်းမြင့်တက်မှုများကိုလည်း ကြုံတွေ့နေရလျက်ရှိသည်။

ရန်ကုန်မြို့အတွင်းရှိ စက်သုံးဆီအရောင်းဆိုင်အချို့တွင် စက်သုံးဆီလုံ‌လောက်စွာမရှိသည့်အတွက် အကန့်အသတ်ဖြင့်သာ ရောင်းချနေရပြီး ကားများစွာ တန်းစီစောင့်ဆိုင်းကာ ဆီဝယ်ယူမှုများလည်း ရှိနေသည်။

“ဓာတ်ဆီတွေဝယ်လို့မရလို့ တန်းစီစောင့်နေရတာ။ အဘဆို မနက်(၄)နာရီထဲက စောင့်နေတာ အခုဆို ၁၂ နာရီတောင်ထိုးတော့မယ် မရသေးဘူး။ အဘရှေ့က ကားတွေဆိုရင် မနက် (၂)နာရီ (၃)နာရီလောက်ထဲက စောင့်နေကြမယ်ထင်တယ်။ ရာသီဥတုကလည်း အရမ်းပူတယ်။ ဆီကလည်းမရသေးဘူး” ဟု သက်ကြီးပိုင်းအရွယ် တက္ကစီမောင်းနှင်သည့် အမျိုးသားတစ်ဦးက ဆိုသည်။

ယနေ့ သြဂုတ်လ (၁၅)ရက်နေ့တွင် စက်သုံးဆီတင်သွင်းသိုလှောင်ဖြန့်ဖြူး ခြင်းလုပ်ငန်း ကြီးကြပ်ရေးကော်မတီက 92 တစ်လီတာလျှင် ၂၇၅၀ ကျပ်နှင့် 95 တစ်လီတာလျှင် ၂၈၉၀ ကျပ်သတ်မှတ်ထားသော်လည်း ပြင်ပဈေးကွက် ၌ ဓာတ်ဆီတစ်လီတာလျှင် ၇ဝဝဝ ကျပ်အထိ ပေါက်ဈေးရှိနေကြောင်း သိရသည်။

လက်ရှိ နစကအစိုးရလက်ထက်တွင် စက်သုံးဆီနှင့်ပတ်သက်၍ ပြတ်လပ်မှုဖြစ်ပေါ်နေသည်ဆိုသည့်သတင်းများ မကြာခဏဆိုသကဲ့သို့ ထွက်ပေါ်ခဲ့ ဖူးသည်။