စော (NSS) - ဩဂုတ် ၁၅

အိန္ဒိယနိုင်ငံ ပိုင်းခြားခြင်းအတွက် ဝမ်းနည်းထိတ်လန့်မှုများ အောက်မေ့ဖွယ်ရာနေ့(Partition Horrors Remembrance Day)ကို ရန်ကုန်မြို့၊ ကျောက်တံတားမြို့နယ်၊ ကုန်သည်လမ်းရှိ  မြန်မာနိုင်ငံဆိုင်ရာ အိန္ဒိယသံရုံးတွင် ယမန်နေ့(ဩဂုတ်လ ၁၄ ရက်)က ကျင်းပခဲ့ခြင်းဖြစ်သည်။

အဆိုပါအခမ်းအနားတွင် အိန္ဒိယနိုင်ငံသံအမတ်ကြီး H.E. Mr. Abhay Thakurက ပိုင်းခြားခြင်းအတွက် ဝမ်းနည်းထိတ်လန့်မှုများ အောက်မေ့ဖွယ်ရာနေ့တွင် အိန္ဒိယနိုင်ငံ၏ ပိုင်းခြားမှုအတွင်း ကြီးမားသောအိုးမဲ့အိမ်မဲ့ဖြစ်မှုနှင့် အခက်အခဲများကို ကြုံတွေ့ခဲ့ရသော လူမှုအသိုက်အဝန်းများနှင့် လူပုဂ္ဂိုလ်များကို အမှတ်ရကြပြီး အခက်အခဲများကြားတွင် ထူးထူးခြားခြား ခံနိုင်ရည်ရှိသူများကိုလည်း ဂုဏ်ပြုကြောင်း ပြောကြားခဲ့သည်။

အိန္ဒိယနိုင်ငံ၏ လူမှုစီးပွားဖွံ့ဖြိုးတိုးတက်ရေးတွင် အားလုံးပါဝင်ရေးနှင့် ရင်းနှီးမြှုပ်နှံမှုဆိုင်ရာ ချဉ်းကပ်ပုံအား အိန္ဒိယဝန်ကြီးချုပ်၏ ပြောကြားချက်ဖြစ်သော “အားလုံးနှင့်အတူတူ၊ အားလုံးအတွက် ဖွံ့ဖြိုးတိုးတက်ရေး၊ အားလုံးကို ယုံကြည်မှုနှင့်  အားလုံးရဲ့ ကြိုးစားအားထုတ်မှု" ဆိုသည့်စကားရပ်ဖြင့် ဖော်ပြနိုင်ကြောင်း အိန္ဒိယနိုင်ငံသံအမတ်ကြီးက ပြောဆိုခဲ့သည်။ 

ထို့ကြောင့် အိန္ဒိယ၏ ပိုင်းခြားမှုအတွေ့အကြုံ ကွဲပြားမှုများကို လိုက်လျော ညီထွေဖြစ်စေရန်နှင့် အဆိုပါအထိမ်းအမှတ်အခမ်းအနားသည် ကမ္ဘာလုံးဆိုင်ရာ ငြိမ်းချမ်းရေးနှင့် သဟဇာတဖြစ်မှုကို မြှင့်တင်ရန်အတွက် အိန္ဒိယနိုင်ငံ၏ အတွေ့အကြုံများကို မျှဝေခြင်းဖြစ်ကြောင်း ၎င်းကဆက်လက်ပြောဆိုခဲ့သည်။

အိန္ဒိယနိုင်ငံသည် ဟိန္ဒူဘာသာဝင်လူမျိုး  (၁ ဒသမ ၁) ဘီလျံ၊ မွတ်ဆလင်လူမျိုး သန်း (၂၀၀)၊ ခရစ်ယာန်လူမျိုး သန်း (၃၀)၊ ဆစ်ခ်လူမျိုး သန်း (၂၀)၊ ဗုဒ္ဓဘာသာဝင်လူမျိုး (၁၀) သန်းနှင့် ဂျိန်းဘာသာဝင်လူမျိုး (၅) သန်းတို့ နေထိုင်ကြကြောင်း သိရသည်။ 

ထို့ပြင် အိန္နိယနိုင်ငံတွင် မတူညီသောတရားဝင်ဘာသာ စကား (၂၂)မျိုးရှိပြီး အိန္ဒိယပြည်နယ် သို့မဟုတ် ပြည်ထောင်စုနယ်မြေတိုင်းသည် ၎င်းတို့၏မိခင်ဘာသာစကားဖြင့် တရားဝင်စီးပွားရေးလုပ်ငန်းကို လုပ်ဆောင်နိုင်ကြောင်း သိရသည်။