သန့်ဇင် (NSS) - ဩဂုတ် ၁၄

လတ်တလောဖြစ်ပွားသည့်တိုက်ပွဲများကြောင့် စစ်ဘေးရှောင်လာသူများကို ပစ်မှတ်ထားကာ လိမ်လည်မှုများ ရှိနေသည့်အတွက် အချို့မှာ တစ်ပူပေါ် နှစ်ပူဆင့်သော အခြေအနေဖြစ်နေကြောင်း ဒေသခံများထံ NSS က မေးမြန်းထားချက်များအရ သိရသည်။

MNDAA နှင့် TNLA ပူးပေါင်းအဖွဲ့များသည် (၁၀၂၇) စစ်ဆင်ရေးအဆက်ဟုဆိုကာ တိုက်ပွဲများ ဖော်ဆောင်လာသောကြောင့် လားရှိုးမြို့၊ ကျောက်မဲစသဖြင့် မြို့နယ်များမှ ဒေသခံအများအပြားသည် မိမိတို့ အိုးအိမ်များကိုစွန့်ခွာကာ နေရပ်မှတိမ်းရှောင်ခဲ့ကြရသည်။ ထိုသို့ တိမ်းရှောင်ရာတွင် တိုက်ပွဲ ဖြစ် ရာဒေသ၌ မိသားစုဝင်များကျန်ခဲ့ကာ အဆက်အသွယ် ပြတ်တောက်နေသောကြောင့် အကူအညီပေးကြရန် သို့မဟုတ် အဆက်အသွယ်ပြန်လည်ရရှိရေး ဆောင်ရွက်ပေးရန် ၎င်းတို့၏ လူမှုကွန်ရက်စာမျက် နှာများကတဆင့် ဖုန်းနံပါတ်များ ထည့်သွင်းအကူအညီတောင်းသည့်အပေါ် အမြတ်ထုတ်ခြင်းများ အများဆုံး ရှိနေခြင်းဖြစ်သည်။ 

“(မိသားစုဝင်တစ်ယောက်ယောက်တိုက်ပွဲဖြစ်တဲ့မြို့မှာကျန်ခဲ့လို့) တချို့ကပူပန်နေပြီး လိုင်းပေါ် မှာ ကူညီပေးပါဆိုပြီး ဖုန်းနံပါတ်နဲ့တင်လိုက်တော့ စားဖားသမားတွေကလည်း ဒီခွင်ကိုဘယ်လိုလိမ်လိုက် မယ်ဆိုပြီး အကြိုက်တွေ ဖြစ်ကုန်တာပေါ့။ တချို့ကလည်း အဖေကျန်ခဲ့လို့၊ ခွေးလေးကျန်ခဲ့လို့၊ ပစ္စည်း ကျန်ခဲ့လို့ ယူပေးလို့ရမလား၊ ခေါ်ပေးလို့ ရမလားနဲ့ လိုင်းပေါ်တင်ကြတာပေါ့။ အဲဒီတော့ လိမ်ချင်တဲ့လူက တော့ လိမ်လိုက်တာပေါ့” ဟု လားရှိုးမြို့မှ စစ်ဘေးရှောင်လာသူတစ်ဦးက  NSS သို့ ပြောသည်။

ထိုသို့ လိမ်လည်ရာတွင် MNDA ၊ TNLA  စသည်ဖြင့် လက်နက်ကိုင်အကြမ်းဖက်အဖွဲ့ ဟန်ဖြင့် ဖုန်းဆက်၍ အဆက်အသွယ်မရသူကို ဖမ်းဆီးထားကြောင်းနှင့် လွတ်မြောက်စေလိုပါက တစ်ဦးလျှင် ငွေကျပ် နှစ်သိန်းခွဲပေးကာ ပြန်ရွေးရမည်ဖြစ်ကြောင်း နှင့် အွန်လိုင်းမှ ငွေလွှဲပေးရမည်ဟုဆိုကာ လိမ်လည်ခြင်းများ ရှိနေကြောင်း ၎င်းက ဆိုသည်။ 

ထို့ပြင် ကားသမားအယောင်အဆောင်ကာ တိမ်းရှောင်မည့်မြို့အထိ ငွေပမာဏ မည်မျှပေးရမည် ဟုဆိုကာ လိမ်လည်ခြင်းမျိုးလည်းရှိကြောင်း သိရသည်။ “အခုနောက်ပိုင်းတော့ နည်းနည်းလေးပြန် လျော့သွားပြီ။ ပြီးခဲ့တဲ့ (၂)ပတ်လောက်ကတော့ တော်တော်များတယ်။ မန္တလေးကို အပြီးအစီး(၆)သိန်း တို့၊ တချို့ ဆို(၁၀)သိန်းတို့ အိမ်အရောက်လာခေါ်မယ်တို့ လိမ်တာပေါ့။ လိမ်ပုံ လိမ်နည်းကလည်း စိတ်ချ ရတဲ့ပုံစံမျိုး နဲ့ပေါ့။ ပထမတော့ အိမ်လိပ်စာတွေတောင်းတယ်ပေါ့။ စစချင်းတုန်းကတော့ အိမ်အရောက်မှ ပေးပေါ့။ ကား ပေါ်ရောက်မှပေးပေါ့။ လမ်းမှာလာနေရင်းနဲ့ ဘာလိုလို့ ညာလိုလို့ဆိုပြီး Kpay နဲ့လွှဲခိုင်း လိုက်ပြီး လိမ်သွားတာမျိုးတွေရှိတယ်” ဟု ကျောက်မဲမြို့မှ စစ်ဘေးရှောင်လာသူတစ်ဦးက ပြောသည်။

ထိုသို့ လိမ်လည်ခြင်းများအပြင် ထားခဲ့ရသည့် နေအိမ်များကို ဖောက်ထွင်းမှုများလည်းရှိနေပြီး ဒေသခံများအနေဖြင့် နောက်ကြောင်းမအေးဘဲ စိုးရိမ်ရခြင်းများရှိနေသကဲ့သို့ အချို့ကလည်း မြေကျန်လျှင် ရပြီဟုဆိုကာ စိတ်လျှော့နေကြသူများလည်း ရှိသည်။ 

“ဖောက်ထွင်းခံရတာနဲ့ပတ်သက်ပြီး လက်တွေ့ကျကျတော့ ရပ်ကွက်ထဲမှာ ကျန်ခဲ့တဲ့ ဆေးသမားတွေ ဘာတွေက ဖောက်တာများတယ်။ အဲဒါတော့ လက်တွေ့ ကျကျသိတာပေါ့။ ရပ်ကွက်ထဲမှာတော့ မရှောင်ဘဲ ဆေးသမားလိုလိုဘာလိုလိုနဲ့ သေမထူး၊ နေမထူး သမားတွေ အဲလိုလူငယ်လေးတွေ လုပ်တာ လို့ ကျွန်တော်တို့ရပ်ကွက်ထဲမှာ ကျန်ခဲ့တဲ့လူတွေပြောပြလို့ သိရတာ။ အဲဒီမှာ မင်းတို့ကိုယ့်လူမျိုး အချင်း ချင်း အဲလိုမလုပ်နဲ့ ကူညီရမှာတောင်မကူညီဘဲနဲ့ ဘာလို့ အဲဒီလိုလုပ်တာလဲပြောတော့ သူ့ကိုတောင် ဖောက်တဲ့ကောင်တွေက မကြည်သလို ရန်ရှာသလိုဖြစ်နေတာကို ကျွန်တော့်ဆီဖုန်းဆက်ပြောလို့ သိရတယ်” ဟု အထက်ပါလားရှိုးမြို့မှ တိမ်းရှောင်လာသူက ဆိုသည်။ 

ကျောက်မဲမြို့တွင်းရှိ စစ်ဘေးရှောင်များ၏နေအိမ်များကို ဖောက်ထွင်းလုယက်မှုများရှိနေရာ နေအိမ်ဖောက်ထွင်း လုယက်မှုတွင် TNLA  အဖွဲ့ ဝင်များလည်း ပါဝင်ကြောင်း ကျောက်မဲမြို့မှ တိမ်း ရှောင်လာခဲ့သူ ဒေသခံက အတိအကျပြောသည်။ “ အိမ်ဖောက်ထွင်းခံရတာမှာ (၂)မျိုးရှိတယ်။ တစ်ခုက TNLA က ဖောက်တာရှိတယ်။ နမ့်တုပ်နားကအိမ်ဆို TNLA က စားသောက်ဆိုင်တွေ ကုန်စုံဆိုင်တွေမှာ ဖောက်ထားတာတွေရှိတယ်။ နောက်တစ်မျိုးကတော့ ၁၀၉-၁၁၀ကောင်တွေက အိမ်တွေ၊ ဆိုင်ခန်းတွေ ဖောက်တာ ရှိတယ်။ လားရှိုးလောက်တော့ မဆိုးဘူးပေါ့။ ဖောက်တော့ဖောက်ကြတယ်။ တချို့က စားစရာ ပဲယူသွားတာမျိုး။ တချို့ကလည်း တန်ဖိုးကြီးပစ္စည်းတွေယူသွားတာမျိုးတွေ၊ ဆိုင်ကယ်တို့၊  TV တို့ အဲဒါ များတွေယူသွားတာများတယ်။ ဆိုင်ကယ်တွေ ခိုးကြတာများတာကိုး။ အဖွဲ့လိုက်ခိုးကြ တာပါ”ဟု အထက်ပါ ဒေသခံက ဆက်လက်ပြောသည်။

လက်ရှိတွင် ရှမ်းပြည်နယ်မြောက်ပိုင်းမှ နေရပ် စွန့်ခွာစစ်ဘေးရှောင်ပြည်သူအများစုသည် ရှမ်းပြည်နယ်တောင်ပိုင်းရှိ တောင်ကြီး၊ ဆီဆိုင်၊ ညောင်ရွှေမြို့ နှင့် မန္တလေးမြို့တို့တွင် အများဆုံးပြောင်းရွှေ့နေထိုင်နေရကြောင်းလည်း သိရသည်။