ယွန်း(NSS) - ဇွန် ၁၁

ပြည်တွင်းရှိ နေရာအချို့သို့ Adventure Trip ပါဝင်သော ညအိပ် Camp ခရီးစဉ်များ စီစဉ်ပေးရန် ပြည်ပခရီးသွားများက တောင်းဆိုမှုများရှိနေကြောင်း မြန်မာနိုင်ငံခရီးသွား လုပ်ငန်းရှင်များအသင်းထံမှ သိရသည်။ 

မြန်မာနိုင်ငံခရီးသွားလုပ်ငန်းရှင်များအသင်းအနေဖြင့် အပန်းဖြေစခန်း ဆောင်ရွက်သူများ တရားဝင်လည်ပတ်ရပ်တည်နိုင်ရေးအတွက်   Day Trip များ၊ Camp များ လုပ်ငန်းလိုင်စင် ရရှိရေးကို ပြောဆိုညှိနှိုင်းဆောင်ရွက်မှုများ ရှိနေကြောင်းသိရသည်။ “ အပန်းဖြေ ရိပ်သာတွေ၊ အပန်းဖြေစခန်းတွေ လုပ်ထားတဲ့သူတွေကကျတော့ သက်ဆိုင်ရာကနေ ယာယီခွင့်ပြုချက်လက်မှတ်တွေ၊ လိုင်စင်တွေရယူဖို့ လိုပါတယ်။ ကျွန်တော်တို့ ဘက်ကလည်း တင်ပြနေပါတယ်။ ဥပမာ- အပန်းဖြေစခန်းဆိုရင် ဟိုတယ် လိုင်စင်မျိုးလည်းမဟုတ်ဘူးဖြစ်နေတာပေါ့။ အဲဒီတော့ တခြားဝန်ဆောင်မှုလိုင်စင်ကိုရယူဖို့လည်း ပြောထားပါတယ်။ နိုင်ငံတော်ကိုလည်း တင်ပြထားပါတယ်။ ပေးသင့်ပေးထိုက်တဲ့ ကိစ္စလည်း ဖြစ်ပါ တယ်။ ကျွန်တော်တို့ဘက်ကလည်း တွန်းအားပေးထားပါတယ် ” ဟု မြန်မာနိုင်ငံခရီးသွားလုပ်ငန်း ရှင်များအသင်းဥက္ကဋ္ဌ ဦးနောင်းနောင်းဟန်က NSS ကို ပြောသည်။

လက်ရှိတွင် ဟိုတယ်နှင့် တည်းခိုရိပ်သာများကဲ့သို့ အပန်းဖြေရိပ်သာများနှင့် အပန်းဖြေစခန်းများ ကို အခြားဝန်ဆောင်မှု လိုင်စင်ရရှိရေးအတွက် တင်ပြထားပြီး တိုင်းဒေသကြီးနှင့် ပြည်နယ်အချို့တွင် လိုင်စင်ရရှိရေးအတွက် ဆောင်ရွက်မှုများရှိနေကြောင်းသိရသည်။ ထို့ပြင် ပြည်ပနိုင်ငံသားများအနေဖြင့် မြန်မာနိုင်ငံ၌ adventure ပုံစံခရီးသွားရခြင်းကို စိတ်ဝင်စားလျက်ရှိပြီး  Day return trip နှင့် တစ်ညအိပ် ခရီးစဉ် သွားရောက်ရန် တောင်းဆိုမှုများလည်းရှိနေကြောင်း သိရသည်။

“ ပြည်ပခရီးသွားအနေနဲ့ ကြည့်မယ်ဆိုရင် တချို့တွေက အဲဒါမျိုးတွေကို စိတ်ဝင်စားတာရှိ ပါတယ်။ မြို့ပြကိုမကြိုက်ဘူး တောတောင်ထဲမှာသွားကြည့်တာမျိုး ၊ Adventure ပုံစံမျိုးနဲ့ လှေအပျော် စီးမယ် ဆိုတာမျိုးတွေကို တောင်းဆိုတာမျိုးတွေရှိတယ်။ ဒါပေမဲ့ လက်ရှိက လိုင်စင်မရသေးတဲ့အပေါ်မှာ စီစဉ်မယ်ဆိုရင် အဆင်မပြေဘူးလေ။  Day return trip ဆိုရင်တော့ အဆင်ပြေပါတယ်။ မနက်ခင်း သွားတယ်။ ညကျရင်ဟိုတယ်မှာပြန်အိပ်တာမျိုးက တော့ လုပ်လို့ရပါတယ်။ လိုင်စင်ရယူထားတဲ့ ဟိုတယ်မှာပဲ တည်းရတာဖြစ်တဲ့အတွက် ခုလောလောဆယ် နိုင်ငံခြားသားကိုတော့ တစ်ညအိပ်ခရီးစဉ် တော့ ကျွန်တော်တို့ လုပ်လို့မရသေးပါဘူး။ Day Return Trip ဆိုရင်တော့ အနည်းနဲ့အများ စီစဉ်နေတာ လေးတွေတော့ ရှိပါတယ်။ ပြည်ပစိတ်ဝင်စားမှုကတော့ ရှိပါတယ်'ဟု ဥက္ကဋ္ဌ ဦးနောင်းနောင်းဟန်က ဆိုသည်။

တရားဝင်လိုင်စင်ရယူဆောင်ရွက်ခြင်းကြောင့် ခရီးသွားများအနေဖြင့် ၎င်းတို့၏ရပိုင်ခွင့်များကို အပြည့်အဝရရှိနိုင်မည့်အပြင် နိုင်ငံတော်အနေဖြင့်လည်း ထိုက်သင့်သည့် အခွန်ငွေများကို ရရှိနိုင် ကြောင်း သိရသည်။ ပြည်တွင်း၌ ဒေသတွင်းလုံခြုံရေးနှင့် တည်ငြိမ်ရေးတို့အပေါ်တွင် မူတည်၍ ပြည်ပ ခရီးသွားဝင်ရောက်မှု နည်းပါးလျက်ရှိပြီး ပြီးခဲ့သည့် ၂၀၂၃ ခုနှစ်တွင် နယ်စပ်ဒေသမှ (၈)သိန်းခန့် ဝင် ရောက်ခဲ့ပြီး လေကြောင်းခရီးစဉ်မှ (၃)သိန်းကျော်သာ ဝင်ရောက်ခဲ့ခြင်းကြောင့် ခရီးသွားဦးရေ (၁)သန်း ကျော်ခန့်သာရှိခဲ့သည်။