Pika (NSS) - ဖေဖော်ဝါရီ ၁၉ 

ဖိလစ်ပိုင်နိုင်ငံတောင်ပိုင်းတွင် စစ်တပ်နှင့် အစွန်းရောက်ဝါဒီ စစ်သွေးကြွအဖွဲ့ကြား တိုက်ပွဲဖြစ်ပွားခဲ့ပြီး စစ်သား (၆)ဦး နှင့် အစွန်းရောက်ဝါဒီ စစ်သွေးကြွအဖွဲ့ဝင်(၁)ဦးတို့ သေဆုံးခဲ့ကြောင်း ဖိလစ်ပိုင်စစ်တပ်ပြောရေးဆိုခွင့်ရှိသူ တစ်ဦးက ဖေဖော်ဝါရီလ(၁၉)ရက်တွင် ထုတ်ဖော်ပြောဆိုခဲ့သည်။

ပြီးခဲ့သည့်နှစ် ဒီဇင်ဘာလတွင် ဖြစ်ပွားခဲ့သော ကတ်သလစ်ဘုရားကျောင်း ဗုံးခွဲတိုက်ခိုက်ခံရမှုတွင် ပါဝင်သည်ဟု သံသယရှိသူ စစ်သွေးကြွအဖွဲ့ဝင်များကို စစ်တပ်က လိုက်လံရှာဖွေနေချိန်တွင် ယခုကဲ့သို့တိုက်ပွဲများ ဖြစ်ပွားခဲ့ခြင်း ဖြစ်ကြောင်း သိရသည်။ 

စစ်တပ်နှင့် စစ်သွေးကြွအဖွဲ့ကြား တိုက်ပွဲသည် Mindanao ကျွန်း Munai မြို့အနီးရှိ တောထဲတွင် ဖေဖော်ဝါရီလ (၁၈)ရက်က ဖြစ်ပွားခဲ့ခြင်းဖြစ်ကြောင်း ဖိလစ်ပိုင်စစ်တပ်ပြောရေးဆိုခွင့်ရှိသူ ဗိုလ်မှူးကြီး Louie Dema-ala က ပြောကြားခဲ့သည်။

၎င်းက "ဒါဟာ Dawlah Islamiyah စစ်သွေးကြွအဖွဲ့ကို ဆန့်ကျင်တဲ့စစ်ဆင်ရေးရဲ့ တစ်စိတ်တစ်ပိုင်းပဲဖြစ်ပါတယ်။ ကံမကောင်းစွာနဲ့ပဲ ကျွန်တော်တို့ဘက်က အသေအပျောက်များခဲ့ပါတယ်" ဟု ပြောခဲ့သည်။ 

အဆိုပါတိုက်ပွဲအတွင်း နောက်ထပ်စစ်သား(၄)ဦးလည်း ထိခိုက်ဒဏ်ရာများရရှိခဲ့ကြောင်း Louie Dema-ala က ပြောကြားခဲ့သည်။  ၂ဝ၂၃ ခုနှစ် ဒီဇင်ဘာလ (၃)ရက်တွင် Marawi မြို့မှာဖြစ်ပွားခဲ့သော ကတ်သလစ်ဘုရားကျောင်း ဗုံးခွဲမှုအတွက် ၎င်းတို့တွင်တာဝန်ရှိကြောင်း Dawlah Islamiyah စစ်သွေးကြွအဖွဲ့က ထုတ်ဖော်ပြောထားသည်။ 

အဆိုပါဗုံးခွဲမှုကို လုပ်ဆောင်ခဲ့သူဟု စွပ်စွဲပြောဆိုခံထားရသော ခေါင်းဆောင် Khadafi Mimbesa အပါအဝင် Dawlah Islamiyah စစ်သွေးကြွအဖွဲ့ဝင်(၁၀)ဦးကို ပြီးခဲ့သည့်လတွင် သတ်ပစ်နိုင်ခဲ့ကြောင်း ဖိလစ်ပိုင်စစ်တပ်က ပြောခဲ့သည်။

ဖိလစ်ပိုင်နိုင်ငံတောင်ပိုင်းတွင် ဆယ်စုနှစ်ကျော်ကြာ ဖြစ်ပွားနေသော မငြိမ်မသက်မှုများအတွင်း စစ်သွေးကြွအဖွဲ့ များသည် ဘတ်စ်ကားများ၊ ကတ်သလစ်ဘုရား ကျောင်းများ နှင့် ဈေးများကို တိုက်ခိုက်မှုများ လုပ်ဆောင်လျက်ရှိ ကြောင်း သိရသည်။

ဖိလစ်ပိုင်အစိုးရသည် နိုင်ငံအတွင်း အကြီးဆုံး လက်နက်ကိုင်တပ်ဖွဲ့ဖြစ်သော Moro Islamic Liberation Front နှင့် ငြိမ်းချမ်းရေးသဘောတူစာချုပ်ကို ၂ဝ၁၄ ခုနှစ်တွင် လက်မှတ်ရေးထိုးခဲ့ပြီး လက်နက်ကိုင်ပုန်ကန်မှုများကို အဆုံးသတ်ခဲ့ကြောင်း သိရသည်။ သို့သော်လည်း ISIS အကြမ်းဖက်အဖွဲ့နှင့်ဆက်နွယ်သော စစ်သွေးကြွများ အပါအဝင် လက်နက်ကိုင်တပ်ဖွဲ့အုပ်စုငယ်အချို့က အဆိုပါငြိမ်းချမ်းရေးသဘောတူစာချုပ်ကို ဆန့်ကျင်လျက်ရှိ ကြောင်းလည်း သိရသည်။