Pika (NSS) - ဖေဖော်ဝါရီ ၁၉ 

ပင်လယ်နီဒေသ ကူးသန်းရောင်းဝယ်ရေးလမ်းကြောင်းကို ဘေးကင်းလုံခြုံအောင် ထိန်းသိမ်းရာတွင် တရုတ်နိုင်ငံ အနေဖြင့် အခန်းကဏ္ဍတစ်ခုမှ ပါဝင်သင့်ကြောင်း ကနေဒါနိုင်ငံခြားရေးဝန်ကြီး Melanie Joly က ဖေဖော်ဝါရီလ (၁၈)ရက်တွင် ထုတ်ဖော်ပြောခဲ့သည်။

ပင်လယ်နီအတွင်းရှိ တရုတ်သင်္ဘောများသည် အန္တရာယ်များဖြင့် ကြုံတွေ့နိုင်ရသောကြောင့် ယခုကဲ့သို့ပါဝင်ရန် တိုက်တွန်းရခြင်းဖြစ်ကြောင်း  Melanie Joly က ထပ်မံပြောခဲ့သည်။ ထို့အပြင် ရုရှားနိုင်ငံကို နိုင်ငံတကာပိတ်ဆို့ အရေးယူမှုများအောက်မှ ရှောင်ထွက်နိုင်စေရန်အတွက် ကူညီပေးနေခြင်းအား ရပ်တန့်ရန် တရုတ်အစိုးရကို ၎င်းက ထပ်မံတိုက်တွန်းပြောဆိုခဲ့ကြောင်း သိရသည်။

ပင်လယ်နီဒေသ ကူးသန်းရောင်းဝယ်ရေးလမ်းကြောင်း ဆက်လက်ပွင့်နေစေရန်အတွက် ဟူသီလက်နက်ကိုင်အဖွဲ့ ကို ဩဇာလွှမ်းမိုးနိုင်ရန် လုပ်ဆောင်ရာတွင် တရုတ်နိုင်ငံက ကူညီပေးရန် လိုအပ်ကြောင်းလည်း ၎င်းက ပြောခဲ့ သည်။ ကနေဒါနိုင်ငံခြားရေးဝန်ကြီး Melanie Joly သည် ဖေဖော်ဝါရီလ(၁၇)ရက်တွင် တရုတ်နိုင်ငံခြားရေး ဝန်ကြီးဝမ်ယိ နှင့် တွေ့ဆုံစဉ်အချိန်အတွင်း ယခုကဲ့သို့ပြောဆိုခဲ့ခြင်းဖြစ်ကြောင်း သိရသည်။ 

Melanie Joly က "ဒါကလည်း တရုတ်နိုင်ငံရဲ့အကျိုးစီးပွားအတွက်ပဲဖြစ်ပါတယ်" ဟု ပြောခဲ့သည်။

အစ္စရေး-ဟားမက်စစ်ပွဲ စတင်ဖြစ်ပွားပြီးနောက်ပိုင်းတည်းက အီရန်ကျောထောက်နောက်ခံပြု ဟူသီလက်နက် ကိုင်အဖွဲ့သည် ပင်လယ်နီအတွင်းရှိ ကုန်တင်သင်္ဘောများကို ပစ်မှတ်ထားတိုက်ခိုက်မှုများအား ဆက်တိုက် လုပ်ဆောင်ခဲ့ခြင်းဖြစ်ကြောင်း သိရသည်။ ဂါဇာကမ်းမြောင်ဒေသရှိ ပါလက်စတိုင်းလူမျိုးများကို ထောက်ခံသည့် အနေဖြင့် ပင်လယ်နီအတွင်းသွားလာနေသော ကုန်တင်သင်္ဘောများကို ပစ်မှတ်ထားတိုက်ခိုက်နေခြင်းဖြစ်ကြောင်း ဟူသီလက်နက်ကိုင်အဖွဲ့က ပြောခဲ့သည်။

ထို့အပြင် ဟူသီလက်နက်ကိုင်အဖွဲ့၏ တိုက်ခိုက်မှုများကို ထိန်းချုပ်နိုင်ရန်အတွက် အီရန်နိုင်ငံမှတစ်ဆင့် ကြားဝင် စွက်ဖက်မှုများ လုပ်ဆောင်ပေးရန် တရုတ်အစိုးရကို အမေရိကန် နှင့် ဗြိတိန်အစိုးရတို့က တိုက်တွန်းခဲ့ကြောင်း လည်း သိရသည်။